سعودی عرب/مکہ مکرمہ:25جون(ایچ ڈی نیوز) خانہ کعبہ کی کلید(چابی) شیبی قبیلے کےنئے محافظ عبد الوہاب بن زین العابدین الشیبی کو سونپ دی گئی۔خدام حرمین شریفین کے سربراہ کی موجودگی یہ مبارک عمل انجام پذیر ہوا۔واضح رہے کہ گزشتہ دنوں سعودی عرب میں مسلمانوں کے لیے مقدس شہر مکہ میں بیت اللہ یعنی خانہ کعبہ کے کلید بردار ڈاکٹر صالح بن زین العابدین الشیبی وفات پا گئے تھے۔وہ خانہ کعبہ کے دروازے کی چابی، جسے کلید کہا جاتا ہے، کے محافظ تھے اور کہا جاتا ہے کہ یہ ذمہ داری ان کے خاندان کو پیغمبر اسلام کے دور میں سونپی گئی تھی۔فتح مکہ کے بعد حضور اکرم ﷺ نے سورہ النسا کی 58 ویں آیت کی تلاوت کرتے ہوئے بیت اللہ کے دروازے کی کلید قبیلہ الشیبی کے خاندان کو سونپی تھی۔اس آیت میں اللہ امانتیں لوٹانے اور لوگوں کے درمیان انصاف سے فیصلہ کرنے کا حکم دیتا ہے۔بتادیں کہ صالح بن زین العابدین کا خاندان صدیوں سے بیت اللہ کی چابی کا رکھوالا ہے۔عرب نیوز کے مطابق وہ ’الشیبی‘ خاندان سے کلیدِ کعبہ سنبھالنے والے 109ویں جانشین تھے۔ صالح الشیبی 2013 میں اپنے چچا عبدالقادر طحہ الشیبی کی وفات کے بعد خانہ کعبہ کے کلیدی محافظ بنے تھے۔
