ویلفیئر پارٹی آف انڈیاکی ٹیم نے شاہین باغ میں ہورہے ترقیاتی کاموں کا کیا سروے،جگہ جگہ گندگی کے انبار ،سیور کے مین ہول، کھلے ہوئے ڈھکن حادثات کے دعوت دے رہیں
نئی دہلی،28جولائی(ایچ ڈی نیوز)۔
ویلفیئر پارٹی آف انڈیا او کھلا اسمبلی کے ایک وفد نے زیر قیادت نثاراحمد خان (ضلع صدر جنوبی دہلی)، اور احسن فیروزابادی( کنوینر اوکھلا اسمبلی) نے کل شاہین باغ نئی دہلی رات27 جولائی 2023 کوشاہین باغ ہائی ٹینشن روڈ پر دہلی سرکار اور عام آدمی پارٹی کے ایم ایل اے امانت اللہ خان کے ذریعے کروائے جارہے ترقیاتی (وکاس کاریوں)کاموں کا جائزہ اور سروے کیا ۔ شاہین باغ کا جائزہ لینے کے بعد احسن فیروزآبادی نے کہا کہ جو گلیاں سیور کی پائپ لائن کے لئے کھودی گئیں تھیں ان کو چھ سے آٹھ ماہ گزر گئے اور وہ ابھی تک کھدی پڑی ہیں ،شاہین باغ منڈی جہاں سے اوکھلا کی خواتین سب سے زیادہ خریداری کرتی ہیں مین روڈ سے اندر آنے والا روڈ پچھلے ایک سال سے ابھی تک نہیں بن سکا ہے۔ شاہین باغ کی ایسی بہت سی گلیاں ہیں جہاں عوام کو رکشہ اور ٹو وہیلر سے با آسانی ا اور جا نہیں سکتی۔ ہائی ٹینشن روڈ پر سیور کے جو مین ہول ہیں ان پر ڈھکن نہیں ہیں سب کھلے حادثات کو دعوت دے رہے ہیں، گندگی کا انبار لگا ہے۔
احسن فیروزآبادی نے کہا کہ وارڈ نمبر 128 کی محترمہ اربیہ خان صاحبہ جن کے انڈر میں شاہین باغ آتا ہے انہوں نے کونسلر کی ذمہ داری سنبھالتے ہوئے سب سے پہلا بیان یہ دیا تھا کہ اب علاقے کے حالات بدلیں گے مگر افسوس حالات پہلے سے بھی زیادہ بدتر ہو چکے ہیں_اوکھلا کے ایم ایل اے اورکونسلر کا حال یہ ہے کہ سب ایک دوسرے پر الزام لگاتے ہوئے نظر آتے ہیں مگر عوام کے مسائل کو سنجیدگی کے ساتھ حل پیش کرنے کی کوئی کوشش نہیں کی جاتی ۔ ضلع صدر نثار احمد خان نے کہا کہ ان ہی حالات کے پیش نظر ویلفیئر پارٹی آف انڈیا کا یہ وفد عام آدمی پارٹی کے ممبراسمبلی امانت اللہ خان اور کانگریس کی کونسلراریبہ خان سے مانگ کرتاہے کہ علاقے میں صفائی کا نظم جلد سے جلد بہتر بنایا جائے۔ تاکہ برسات کے موسم میں پیدا ہونے والی موسمیاتی تبدیلیوں کے باعث پھیلنے والی بیماریوں سے بچا جا سکے۔ جیسا کہ معلوم ہورہاہے ڈینگوکے مچھر پیدا ہونے شروع ہوگئے ہیں۔ ہم علاقے کے دونوں نمائندوں کو آگاہ کرنا چاہتے ہیں کہ یا تو صفائی نظام کو فوری درست کر دیا جائے ورنہ ویلفیئر پارٹی آف انڈیا جن آندولن کھڑا کرنے پر مجبور ہو جائے گی ۔اس سے قبل اس وفد نے گزشتہ ہفتے پہلوان چوک گلی نمبر چار کا دورہ کیا تھا جس کی افسوس ناک صورتحال سے ایم سی ڈی اورسی ایم او وغیرہ کو واقف کرایا تھا جس کے بعد فوری طور پر وہاں پر صفائی کا کام کر کرایا گیا تھا۔اس وفد میں کیف احمد، شکیل احمد ،محمد رئیس، صدام وارثی، محمد عاطف، محمد فرقان اور محمد فرمان شامل رہے۔
