ریاض،26فروری(ایچ ڈی نیوز)۔
ویانا کے آرچ بشپ اور کارڈینل کرسٹوف شون برن نے ایک وفد کے ہمراہ سعودی عرب کے دارالحکومت ریاض کا دورہ کیا ہے۔سعودی میڈیا کے مطابق کارڈینل کرسٹوف شون برن نے سیکریٹری جنرل رابطہ عالمِ اسلامی ڈاکٹر محمد عبدالکریم العیسیٰ سے ملاقات بھی کی ہے۔کرسٹوفر شون برن نے ڈاکٹر محمد عبدالکریم العیسی سے ملاقات میں اقوامِ کے درمیان رابطے قائم کرنے کے لیے تبادلۂ خیال کیا۔دونوں مذہبی رہنماؤں کے درمیان تہذیبوں کے ٹکراؤکے معاملے پر مذہبی رہنماؤں کے رابطوں کی اہمیت پر بھی گفتگو ہوئی۔
ڈاکٹر محمد عبدالکریم العیسیٰ نے سماجی رابطے کی ویب سائٹ ٹوئٹر پر اس حوالے سے پیغام میں کہا ہے کہ ویانا کے آرچ بشپ کارڈینل کرسٹوف شون برن سے ملاقات میں متعدد امور پر تبادلہ خیال کر کے بےحد خوشی ہوئی۔
انہوں نے کہا کہ آرچ بشپ اور کارڈینل ویانا کرسٹوف شون برن اقوامِ کے مابین دوستی اور تعاون کے فروغ کے حوالے سے سرگرم مذہبی رہنما ہیں، ان کی جانب سے میثاقِ مکہ مکرمہ کی تعریف اور آنے والی نسلوں کے لیے اس کی اہمیت قابلِ ستائش ہے۔
سکریٹری جنرل رابطہ عالم اسلامی ڈاکٹر محمد عبدالکریم العیسی نے عربی، انگلش اور اردو میں سوشل میڈیا پلیٹ فارم ٹوئٹر پرویانا کے آرچ بشپ اور کارڈینل کرسٹوف شون برن کے ساتھ ملاقات کی تصاویر اور پیغام کو پوسٹ کیا۔
