کوٹہ کے پنچایت مدرسہ فیض عام کے زیر اہتمام عیدگاہ گراؤنڈ میں طلبہ اور طالبات کا ایک تربیتی اور اسلامی پروگرام منعقد
کوٹہ29ستمبر(ایچ ڈی نیوز)۔
رسول اللہ صلی اللہ علیہ وسلم کی ولادتِ مبارکہ کا ذکر یا آپ ؐکے اوصاف ومحاسن اور عبادات ومعاملات کا ذکرحتی کہ جس چیز کی ادنیٰ نسبت بھی نبی کریم ؐکی جانب ہو اس کا ذکر یقیناً فعلِ مستحسن اور باعثِ اجروثواب ہے، آپ ؐ کی دنیا میں آمد دنیا کے لیے ایک عظیم الشان نعمت ہے، اندھیروں میں ایک روشنی ہے، ایک مسلمان کا خوش ہونا فطری امر ہے، جس سے انکار ممکن نہیں، البتہ اس پر خوش ہونے کا وہی طریقہ اختیار کرنا جائز ہے جو محسنِ کائنات ؐ سے ثابت ہو۔مذکورہ خیالات کا اظہار مہمان خصوصی جے ایل این ایجوکیشنل گروپ کے ڈائریکٹر اعظم بیگ فلاحی نے عید میلاد النبیﷺ 12 ربیع الاول 1445ھ ضلع کوٹہ کے پنچایت مدرسہ فیض عام کے زیر اہتمام عیدگاہ گراؤنڈ سنگوڈ میں منعقد طلبہ اور طالبات کے ایک تربیتی اور اسلامی پروگرام میں کیا ۔
انہوں نے مزید کہا کہ ’’ہم تمام مسلمانوں کی دنیاوی فلاح وبہبود کے لئے اور اخروی کامیابی وکامرانی کے لئے صرف دو بنیادی چیزیں ہیں ،ایک اللہ کی کتاب قرآن کریم اور دوسری نبی اکرم ؐ کی سنت مبارکہ،جیسا کہ آپ ؐکا ارشاد گرامی ہے ’’ تمہارے لئے دو چیزیں چھوڑ کے جارہا ہوں جب تک تم ان دونوں کو مضبوطی سے تھامے رہو گے ہرگز گمراہ نہ ہوگے ایک اللہ کی کتاب اوردوسری اس کے نبی کی سنت‘‘ ایک مسلمان کی رشد وہدایت کتاب وسنت کی اتباع میں مضمر ہے ،اور اسی کا نام اسلام ہے ۔
اس پروگرام میں سروودیا ایجوکیشنل گروپ کے ڈائریکٹر جب اے جی مرزا صاحب تھے۔رات 9:00 بجے سے 3 بجے تک جاری رہنے والے اس پروگرام میں علاقہ مکینوں اور والدین کی بڑی تعداد نے شرکت کی۔ اس شاندار تقریب میں موجود ڈاکٹر اعظم بیگ نے تمام منتظمین اور مدرسہ فیض عام، کمیٹی، قبرستان کمیٹی کے تمام اراکین کو مبارکباد پیش کی اور دل کی گہرائیوں سے شکریہ بھی ادا کیا۔
