نئی دہلی،21فروری(ایچ ڈی نیوز)۔
جامعہ ہمدرد بزنس اینڈ ایمپلائمنٹ بیورو (بی ای بی)، ایسوسی ایشن آف مسلم پروفیشنلز (اے ایم ٹی) کے مشترکہ زیر اہتمام 25 فروری 2023 کو جامعہ ہمدرد کے احاطے میں ایک میگا جاب فیئر منعقد کرنے کا فیصلہ کیا گیا ہے۔ اس جاب فیئر کے لیے آن لائن رجسٹریشن بالکل مفت کی جا رہی ہے۔ میلے میں ملک کی 88 معروف کمپنیاں شرکت کے لیے آرہی ہیں، گزشتہ سال جاب فیئر میں 14000 افراد نے شرکت کی تھی جن میں سے 4000 افراد کو مختلف کمپنیوں کے ذریعے موقع پر ہی ملازمتیں فراہم کی گئیں۔ جاب فیئر کے بارے میں معلومات دیتے ہوئے بی ای بی کے ایجوکیشنل سیکرٹری شوکت مفتی نے بتایا کہ اس بار کے جاب فیئر کےلئے بڑے پیمانے پر تیاریاں کی گئی ہیں، میلے میں دسویں جماعت سے لے کر گریجویٹ تک کے طلباءکو ملازمت کے اچھے مواقع ملنے کی امید ہے۔اب تک 88 کمپنیاں بینکوں، ہسپتالوں اور ٹاٹا گروپ کی کمپنیوں سمیت جاب فیئر میں حصہ لینے کی منظوری دے دی ہے۔
انہوں نے کہا کہ ہمارا مقصد غریب اور کمزور لوگوں کی ترقی ہے اور اسی مقصد کے لیے اس قسم کے میلے کا انعقاد کیا جا رہا ہے۔اسی مقصد کے لیے حکیم عبدالحمید نے بی ای بی کی تشکیل کی تھی۔ میگا جاب فیئر کے ذریعے اپنے مقصد کو پورا کرنے کی کوشش کی جا رہی ہے۔ اے ایم پی ممبئی کے فاروق اے صدیقی نے بتایا کہ یہ ملک بھر میں ان کی طرف سے منعقد ہونے والا 74 واں جاب فیئر ہے۔ انہوں نے بتایا کہ وزیر اعظم نریندر مودی کے ذریعے ہنرمندی کی ترقی کو آگے لے جانے کی کوششیں کی جا رہی ہیں۔ ہمدرد کے بانی حکیم عبدالحمید صاحب نے بھی اپنے دور میں ہنر مندی کو فروغ دینے کےلئے بی ای بی بنائی۔ اس کے ذریعے غریب اور کمزور طبقے کے طلباءکو تربیت فراہم کرنے اور انہیں ملازمتیں فراہم کرنے میں اہم کردار ادا کیا جا رہا ہے۔
اس بارے میں معلومات دیتے ہوئے پروفیسر فرحت بشیر نے کہا کہ اس جاب فیئر کے ذریعے لوگوں کو ایک ہی چھت کے نیچے تمام نوکریاں ملیں گی۔ مختلف قسم کی ملازمتیں فراہم کرنے کی کوششیں کی جا رہی ہیں۔ انہوں نے بتایا کہ جامعہ ہمدرد بی ای بی اور اے ایم پی کی جانب سے اس میلے کو کامیاب بنانے کی ہر ممکن کوشش کی جارہی ہے۔
