دہلی ، 25 مئی (ایچ ڈی نیوز)
دہلی حکومت کے سابق وزیر اور عام آدمی پارٹی کے سینئر لیڈر ستیندر جین کو جمعرات کی صبح ایک بار پھر دین دیال اپادھیائے اسپتال میں داخل کرایا گیا۔تہاڑ جیل کے اہلکار نے بتایا کہ ستیندر جین کو ان کی صحت کی نگرانی کے لیے جیل کے اسپتال میں رکھا گیا تھا ، جہاں وہ آج صبح پھسل کر باتھ روم میں گر گئے۔
معلومات کے مطابق ڈاکٹروں کی جانچ کے دوران جین نے کمر ، بائیں ٹانگ اور کندھے میں درد کی شکایت کی جس کے بعد انہیں فوری طور پر دین دیال اپادھیائے اسپتال میں داخل کرایا گیا۔ گزشتہ ایک ہفتے میں انہیں دوسری بار اسپتال میں داخل ہونا پڑا۔قابل ذکر ہے کہ ستیندر جین منی لانڈرنگ کے الزام میں تہاڑ جیل میں بند ہیں۔
