کولکاتا، 17 مئی (ایچ ڈی نیوز)۔
ریاستی حکومت ٹیم انڈیا کے سابق کپتان اور بورڈ آف کنٹرول فار کرکٹ ان انڈیا (بی سی سی آئی) کے سابق صدر سورو گانگولی کو زیڈ زمرہ کی سیکورٹی فراہم کرنے جا رہی ہے۔ کولکاتا پولیس ذرائع نے اس کی تصدیق کی ہے۔ معلوم ہوا ہے کہ یہ فیصلہ آئی بی کے حالیہ اطلاعات کے بعد گانگولی کی سیکورٹی کے پیش نظر کیا گیا ہے۔ ایک دن پہلے منگل کو ٹھاکرپور تھانے کی پولیس کولکاتا پولیس کی اسپیشل برانچ کے افسران کے ساتھ سورو گانگولی کے گھر گئی تھی۔ اس میں کولکاتا ٹریفک پولیس کے اہلکار بھی شامل تھے۔ گانگولی کے سکریٹری کے ساتھ تقریباً ایک گھنٹے تک جائزہ میٹنگ ہوئی۔
حالانکہ نہ تو گانگولی کے خاندان کی طرف سے اور نہ ہی کولکاتا پولیس کی طرف سے، اس بارے میں سرکاری طور پر کوئی اطلاع نہیں دی گئی ہے لیکن ذرائع نے بتایا ہے کہ سورو گانگولی کو اس ہفتے زیڈ زمرہ کی سیکورٹی دی جائے گی۔ فی الحال انہیں وائی کیٹیگری کی سیکورٹی حاصل ہے۔ دہشت گرد تنظیم لشکر طیبہ نے تقریباً دو دہائی قبل سورو گانگولی کو اغوا کرنے کی دھمکی دی تھی جس کے بعد انہیں زیڈ پلس سیکورٹی دی گئی تھی۔ حالانکہ بعد میں اسے وائی میں تبدیل کر دیا گیا تھا۔
