مسجد عبدالنبی دفتر جمعیة علماءہند میں ختم قرآن تقریب،حافظ محمود بن مولانا حکیم الدین قاسمی کی پذیرائی
نئی دہلی، 08اپریل(ایچ ڈی نیوز)۔
قرآن پاک کے بہت سارے فضائل سنے ہو ں گے، لیکن قرآن کی سب سے اہم فضیلت وہ ہے جو خود اللہ رب العزت نے متعدد آیتوں میں بیان کئے ہیں اور اس کتاب کو ساری کتابوں سے افضل اور کسی طرح کے شک سے پاک بتایا ہے۔ ان خیالات کا اظہار مسجد عبدالنبی دفتر جمعیة علماءہند میں ختم قرآن کی تقریب میں مولانا نیاز احمد فاروقی ناظم جمعیة علماءہند نے کیا۔ انھوں نے بتایا کہ رمضان اور شب قدر کی فضیلت بھی قرآن کی وجہ سے ہے اور دنیا میں جو ق در جوق لوگ قرآن کی وجہ سے ہی ایمان میں داخل ہوئے اور اس امت کی وجہ امتیاز بھی قرآن ہی ہے۔ انھوں نے کہا کہ اللہ تعالی اپنے بندوں سے ستر ماں سے زیادہ پیار کرتا ہے، اس لیے اگر آج مولانا حکیم الدین صاحب اس قدر مسرور ہیں کہ ان کے نو ر نظر نے تراویح میں قرآن مکمل سنایا ہے تو بتائیں کہ اللہ رب العزت کس قدر خوش ہوگا۔ اس لیے اہل ایمان کا یہ شیوہ ہونا چاہیے کہ وہ قرآن کو ہر حال میں سینے سے لگائے اور اس کی تلاوت کو اپنی زندگی کا حصہ بنالے۔
ازیں قبل جمعیة علماءہند کے جنرل سکریٹری مولانا حکیم الدین قاسمی نے افتتاحی کلمات پیش کیے، انھوں نے اس تقریب میں شریک ہونے والوں کا شکریہ ادا کیا۔ انھوں نے کہا کہ قرآن پاک یاد کرنے والا چاہے وہ حافظ ہو یا نہ ہو، حشر میں باری تعالیٰ کے اس انعام کا حق دار ہو گا کہ (قرآن) پڑھتا جا اور (بلندی کی طرف) چڑھتا جا۔انھوں نے شب قدر کی فضیلت پر بھی روشنی ڈالی، انھوں نے گھروں میں بھی نفلی عبادتوں کے اہتمام کی تلقین کی۔مولانا حکیم الدین قاسمی نے مسجد عبدالنبی میں تراویح میں قرآن مکمل کرنے پر اپنے صاحبزادے حافظ محمود پر مسرت کا اظہار کیا اور کہا کہ اس نے کماحقہ تلاوت کی، انھوں نے بتایا کہ کھڈا مظفر نگر میں دوسرے صاحبزادے حافظ ابو بکر نے قرآن مکمل کیا ہے۔حافظ محمود نے اس موقع پر انگریزی خطاب میں اکابرکے مرکز مسجد عبدالنبی میں سنانے کا موقع ملنے پر صدر جمعیةعلماءہند مولانا محمود اسعد مدنی کا شکریہ ادا کیا۔ اس کے علاوہ امام مسجد عبدالنبی مولانا کلیم الدین قاسمی کا بھی شکریہ ادا کیا۔اس موقع پر مولانا مفتی اکرم قاسمی نیپالی نے بھی مختصر مگر جامع خطاب کیا۔ناظم عمومی جمعیةعلماءہند مولانا حکیم الدین قاسمی کی پرسوز دعا پر مجلس اختتام پذیر ہوئی، مجلس کا آغاز مدرسیہ یاسینیہ کھڈا مظفرنگر کے استاذ مولانا محمد سلمان کی تلاوت سے ہوا، مدرسے کے دوسرے استاذقار ی عبدالرب قاسمی بھی موجود تھے۔ قاری احمد عبداللہ رسول پوری نے نعت نبوی صلی اللہ علیہ وسلم پیش کیا۔
تقریب میں ناظم عمومی جمعیةعلماءہند اور مولانا نیاز احمد فاروقی کے علاوہ کمال فاروقی ممبرآل انڈیا مسلم پرسنل لا بورڈ، ایڈوکیٹ طیب خاں، مولانا داود امینی، حاجی آزاد، ڈاکٹر سرفراز مرکز تبلیغ بنگلہ والی مسجدنظام الدین، مولانا جاوید صدیقی، قاری احرار جوہر، مولانا غیاث الدین ترکمان گیٹ، داوو دبھائی،عابد بھائی، صابر بھائی شیووہار دہلی، مفتی زبیر سلطان پوری، حافظ ڈاکٹر ندیم پانی پت،مولانا ولی اللہ قاسمی سہرساوی، مولانا عبدالمعید قاسمی کانپور، مولانا جلیس اتراکھنڈ، نیز دفتر جمعیة علماءہند سے مولانا نجیب اللہ قاسمی، سینئر آرگنائز جمعیةعلماءہند مولانا غیور قاسمی، مولانا عرفان قاسمی، مفتی ذاکر قاسمی، مولانا عظیم اللہ قاسمی، مولانا یاسین جہازی،مولانا ضیاءاللہ قاسمی سمیت پانچ سو سے زائد دہلی و اطراف کے علماءوصلحا شریک ہوئے۔
