آنند نگر مہراج گنج ( نمائندہ): مشرقی یوپی کا معروف فلاحی ادارہ حافظ شجاعت فیض عام چیریٹیبل ٹرسٹ کے جنرل سکریٹری مولانا شمس الہدی صاحب قاسمی نے یتی نر سنگھا نند کی طرف سے پیغمبر اسلام کی شان میں کی گئی گستاخی کی شدید الفاظ میں مذمت کی ہے۔ انہوں نے کہا کہ اس طرح کی نفرت انگیز تقریر ہماری قوم کی ہم آہنگی اور ساکھ کو داغدار کرتی ہے۔ مولانا موصوف نے اپنے ایک بیان میں کہا کہ میں یتی نر سنگھ نند کی طرف سے پیغمبر اسلام کے خلاف توہین آمیز ریمارکس کی شدید مذمت کرتا ہوں، انہوں نے حکومت سے مطالبہ کیا ہے کہ اس کے خلاف فوری اور سخت کارروائی کی جانی چاہئے اس طرح کی نفرت انگیز تقریر ہماری قوم کی ہم آہنگی اور ساکھ کو داغدار کرتی ہے۔
انہوں نے مزید کہا کہ ہمارے ملک میں دن بدن نفرت کا ماحول پیدا کیاجارہا ہے جس کے نتیجہ میں عالمی سطح پر بھارت کی ساکھ متاثر ہورہی ہے۔ ہمیں چاہئے کہ ایک ایسا معاشرہ تشکیل دیں جس میں تمام مذہب کااحترام کیا جائے اور ہر کسی کو اپنے پسند کے مذہب پر عمل پیرا ہونے کی کھلی آزادی ہو۔
ٹرسٹ کے جنرل سپروائزر حافظ عبید الرحمٰن الحسینی نے کہا کہ مسلمان ہر چیز کو برداشت کر سکتا ہے لیکن رسول اکرم صلی اللہ علیہ وسلم کی شان میں گستاخی قطعی برداشت نہیں کر سکتا۔ انہوں مزید کہا کہ نرسنگھا نند ماضی میں بھی گستاخانہ اور اشتعال انگیز بیانات کے ذریعے بدنام زمانہ ملعون ثابت ہو چکا ہے۔ ہم حکومت ہند سے مطالبہ کرتے ہیں کہ نرسنگھا نند کے خلاف بلا تاخیر سخت ترین کارروائی کی جائے۔
