کیرانہ:12 جولائی (ایچ ڈی نیوز)قصبہ کیرانہ میں جہاں چہار جانب سڑکوں کی تعمیر کا کام جاری ہے وہیں قصبہ کیرانہ کے وارڈ نمبر 16 اور 26 میں گندگی کے انبار لگے پڑے ہیں، جس سے برسات میں پھیلنے والے موذی امراض کا خطرہ لاحق ہو گیا ہے۔آج وارڈ نمبر 16اور26 کے عوام نے ایس ڈی ایم کیرانہ کو تحریر دے کر شکایت درج کرائی ہے ۔تحریر میں کہاگیا ہے کہ وارڈ 16 میں گندگی کے انبار لگے ہیں اور صفائی کا نظم نہیں ہے، جس سے علاقے میں بیماریاں پھیلنے کا اندیشہ ہو چلا ہے۔عرفان ملک نے وارڈ ممبر شوہر،نمائندہ فرقان احمد قصار کے خلاف ایس ڈی ایم کیرانہ کو ان کے واٹس ایپ نمبر پر ویڈیو بھیج کر شکایت درج کرائی ہے۔وہیں دوسری جانب پانی پت روڈ کے عوام نے گلشن نگر وارڈ نمبر 26 کے ممبر انتظار انصاری کے چار ماہ سے لاپتہ ہونے کی بات کہی ہے وارڈ کے عوام کا کہنا ہے کہ گلشن نگر میں ممبر چار مہینے سے اس علاقے میں نہیں آئے ہیں، یہاں کا تعمیراتی کام بیچ میں ہی چھوڑ کر فرار ہیں۔لوگوں نے ایس ڈی ایم کیرانہ اور ای او کیرانہ کو تحریر دے کر مطالبہ کیا ہے کہ برسات کے پانی کو گھروں میں جانے سے روکا جائے اور فوری طور پر سڑک تعمیر کرانے کا کام شروع کیا جائے، عوام کا کہنا ہے کہ گلشن نگر میں جہاں صفائی کا فقدان ہے وہیں پانی بجلی کی قلت سے عوام پریشان ہے۔
