نئی دہلی، 05 فروری (ایچ ڈی نیوز)۔
دہلی اسمبلی انتخابات کے لیے آج صبح 7 بجے سے ووٹنگ جاری ہے۔ صدر جمہوریہ ہند دروپدی مرمو سمیت کئی بڑی شخصیات نے اپنے حق رائے دہی کا استعمال کیا۔ صدر جمہوریہ دروپدی مرمو نے ڈاکٹر راجندر پرساد کیندریہ ودیالیہ (پریزیڈنٹ اسٹیٹ، نئی دہلی) میں اپنا ووٹ ڈال کر جمہوریت کے جشن میں حصہ لیا۔
ووٹ ڈالنے والے دیگر بڑے ناموں میں وزیر خارجہ ایس جے شنکر اور کانگریس لیڈر راہل گاندھی شامل ہیں۔ آرمی چیف جنرل اوپیندر دویدی، ڈپٹی این ایس اے پنکج کمار سنگھ، بادلی اسمبلی حلقہ سے ریاستی کانگریس صدر دیویندر یادو، کالکاجی اسمبلی حلقہ سے کانگریس امیدوار الکا لامبا، دہلی بی جے پی کے صدر ویریندر سچدیوا، نئی دہلی اسمبلی حلقہ سے کانگریس کے امیدوار سندیپ دکشت وغیرہ نے اپنا ووٹ ڈالا ہے۔
دہلی کے چیف الیکٹورل آفیسر آر ایلس واز نے دہلی کے لوگوں سے اپیل کی ہے کہ براہ کرم باہر آئیں اور اپنے جمہوری حقوق کا استعمال کرنے کے لیے ووٹ دیں۔دہلی ریاستی کانگریس صدر دیویندر یادو نے بادلی اسمبلی حلقہ کی ترقی اور خوشحالی کے لئے اپنے پورے خاندان کے ساتھ ووٹ ڈالا اور جمہوریت کے اس جشن میں حصہ لیا۔ انہوں نے لوگوں سے بادلی کی خوشحالی اور ترقی کے لئے لوگوں سے بڑھ چڑھ کر ووٹنگ میں حصہ لینے کی اپیل کی۔
قومی دارالحکومت دہلی کی 70 سیٹوں کے لیے شام 6 بجے تک 1.56 کروڑ ووٹر اپنا ووٹ ڈال سکیں گے۔ اس کے لیے 13 ہزار کے قریب پولنگ اسٹیشن بنائے گئے ہیں۔ اس کے علاوہ ایودھیا کے ملکی پور اور تمل ناڈو میں ایروڈ ضمنی انتخاب کے لیے ووٹنگ جاری ہے۔ ووٹوں کی گنتی 8 فروری کو ہوگی۔
