نئی دہلی،10دسمبر:
اردو کے سینئر صحافی اور روزنامہ ہمارا سما ج کے ایڈیٹرعامرسلیم خان کی طبیعت سخت علیل ہونے کی وجہ سے انہیں اسپتال میں داخل کرایا گیا ہے ۔ اطلاعات کے مطابق انہیں آج صبح دل کا دورہ پڑا جس کے بعد انہیں دہلی کے جی بی پنت اسپتال میں داخل کرایا گیا ۔فی الحال ڈاکٹروں نے انہیں وینٹی لیٹر پر رکھا ہے۔قارئین سے دعائے صحت کی اپیل ہے۔ واضح رہے کہ عامر سلیم خان کو یہ دوسری مرتبہ دل کا دورہ پڑا ہے ، اس سے قبل ڈیڑ ھ دو سال پہلے بھی انہیں دل کا دورہ پڑا تھا ۔
قابل ذکر ہے کہ عامر سلیم خان اردو کے نامور صحافی ہیں، ایک لمبے عرصے سے اردو صحافت سے وابستہ ہیں۔وہ گزشتہ 13 برسوں سے روزنامہ ہمارا سماج سے جڑے ہوئے ہیں پہلے وہ چیف رپورٹر کی حیثیت سے سر گرم تھے ۔مگر ادھر کچھ برسوں سے وہ ہمارا سماج کے ایڈیٹر کی ذمہ داری سنبھال رہے تھے۔اس سے قبل وہ ہندوستان ایکسپریس اور روزنامہ راشٹریہ سہارا اردو میں بھی رپورٹر کی حیثیت سے ذمہ داری نبھا چکے ہیں۔ اردو صحافت میں ان کا شمار ایک قابل احترام صحافیوں میں ہوتا ہے اور قدر کی نگاہ سے دیکھے جاتے ہیں۔
