حصار، 9 اپریل (ایچ ڈی نیوز)۔
ہریانہ کے سابق وزیراعلیٰ اور قائد حزب اختلاف بھوپندر سنگھ ہڈا کی کار ضلع کے متلوڑھا گاو¿ں کے قریب حادثہ کا شکارہوگئی۔ یہ حادثہ قافلے کے سامنے نیل گائے کے اچانک آنے کی وجہ سے پیش آیا۔ حادثے میں ان کی گاڑی کو بری طرح نقصان پہنچا اور وہ بال بال بچ گئے۔ بعد میں انہیں دوسری گاڑی میں روانہ کیا گیا۔
اپوزیشن لیڈراورسابق وزیراعلی بھوپندر سنگھ ہڈا کے اتوار کو حصار ضلع میں کئی پروگرام ہیں۔ وہ ضلع کے گھیرئی گاو¿ں میں ورلڈ ویمن باکسنگ چیمپئن شپ کی فاتح سویٹی بورا کے استقبالیہ پروگرام کے لئے جا رہے تھے جب یہ واقعہ پیش آیا۔ بتایا جا رہا ہے کہ ان کا قافلہ منزل کی طرف جا رہا تھا کہ اچانک ایک نیل گائے سامنے آ گئی۔
جیسے ہی نیل گائے سامنے آئی، گاڑی کے ڈرائیور نے اچانک بریک لگائی، لیکن اس دوران نیلگئی اس کی گاڑی سے ٹکرا گئی۔ گاڑی کے ایئر بیگ کھلنے کی وجہ سے وہ بال بال بچ گئے تاہم گاڑی کا اگلا حصہ تباہ ہو گیا۔ بعد ازاں وہ دوسری گاڑی میں پروگرام کے مقام پر پہنچے، اور پروگرام میں حصہ لیا۔
