نئی دہلی،29اپریل(ایچ ڈی نیوز)۔
مشرقی دہلی لوک سبھا حلقہ کے جسولہ وہار شاہین میں عام آدمی پارٹی کے امیدوار کلدیپ کمار کا کانگریس پارٹی کے کارکنوں نے شاندار استقبال کیا اور مل جل کر انڈیا اتحاد کے امیدوار کو جتانے کا عہد کیا۔ پروگرام کا انعقاد کانگریس پارٹی کے نوجوان لیڈر اور ریاستی کانگریس کمیٹی کے سوشل میڈیا کے چیئرمین ہدایت اللہ نے کیا تھا۔اس موقع پر سینئر کانگریسی لیڈر اوربٹلہ ہاوس وارڈ کے کونسلرشعیب دانش،محمد شکیل، محمد رئیس، محمدشاہد،گڈوبھائی،ابرار احمد،کنیزفاطمہ،عارفہ خانم سمیت کانگریس اور عام آدمی پارٹی کے درجنوں کارکنوں موجود تھے۔
مقررین نے اس موقع پر تمام کارکنوں سے زیادہ سے زیادہ ووٹ ڈلوانے کی اپیل کی۔کلدیپ کمار نے بی جے پی پر سخت حملہ بولتے ہوئے آئین کو بدلنے کا الزام عائد کیا۔ انہوں نے کہا کہ عام آدمی پارٹی اور کانگریس کا اتحاد آئین بچانے کیلئے ہی ہوا ہے۔ آئین بچانے کیلئے ہم ہر کسی سے سمجھوتہ کرنے کے لئے تیار ہیں۔انہوں نے بی جے پی کے 400پار کے نعرے کا بھی مذاق اڑاتے ہوئے کہا کہ ان کے لیڈران کہتے ہیں کہ ہمیں 400سیٹیں آئین کو بدلنے کے لئے چاہئے۔انہوں نے کہا کہ پہلے الیکشن تو جیتو آئین بعد میں بدلنا، تمہاری اتنی ہمت نہیں ہے کہ با با صاحب کے آئین کو بدل سکو۔انہوں نے کہا کہ بی جے پی والے سوچتے تھے کہ کیجریوال کو جیل میں ڈال کر ہم دہلی میں الیکشن جیت لیں گے لیکن آج معاملہ الٹا ہوگیا ہے۔ دہلی کا ہر شخص اپنے بیٹے اور بھائی اروند کیجریوال کے ساتھ کھڑا ہے۔عام آدمی پارٹی کے امیدوار نے خبردار کیا کہ اگر مودی جی دوبارہ وزیراعظم بنے تو یہ ملک کا آخری الیکشن ہوگا۔انہوں نے اپنی جیت کا دعویٰ کرتے ہوئے لوگوں سے بڑھ چڑھ کر اووٹنگ میں حصہ لینے کی اپیل کی۔کونسلر شعیب دانش نے کلدیپ یادو کی تعریف کرتے ہوئے کہا کہ پارٹی نے مشرقی دہلی سے ایک اچھے آدمی کو امیدوار بنایا ہے۔ ہم لوگ گھر گھر جاکر کلدیپ کمار کی جیت کے لئے ووٹ مانگیں گے۔
نوجوان لیڈر ہدایت اللہ نے کہا کہ کانگریس پارٹی کا ایک ایک کارکن یہاں سے انڈیا اتحاد کی جیت کے لئے ہر ممکن کوشش کرے گا ۔انہوں نے کہا کہ راہل گاندھی نفرت کی دیوار منہدم کرنے کے لئے ہی کنیا کماری سے کشمیر تک پیدل چل کر لوگوں اور پارٹیوں کو آپس میں متحد کیا ہے۔ اور اسی کا نتیجہ ہے کہ آج عام آدمی پارٹی اور کانگریس کے کارکنان ایک جگہ اکٹھا ہوئے ہیں۔
