نئی دہلی ، 15 جولائی (ایچ ڈی نیوز)۔
آل انڈیا کانگریس کمیٹی اقلیتی شعبہ کے کارکنان سیلاب متاثرین کی مدد کے لیے آگے آئے ہیں۔کانگریس اقلیتی شعبہ قومی صدر اور راجیہ سبھا رکن پارلیمنٹ عمران پرتاپ گڑھی آج اقلیتی شعبہ کے ساتھیوں کے ساتھ دہلی میں سیلاب متاثرین کو راحتی سامان اور کھانا تقسیم کیا۔اس موقع پرکانگریس اقلیتی شعبہ کے قومی صدر نے کہا کہ اس وقت دہلی کے لوگوں پر بہت بڑی مصیبت ہے۔ انہوں نے تمام لوگوں سے سیاست سے اوپر اٹھ کر سیلاب متاثرین کی بڑھ چڑھ کر مدد کی اپیل کی۔
اقلیتی شعبہ کے کارکنوںنے ہفتہ کے روز دہلی کے سیلاب سے متاثرہ علاقوں میں ضرورت مندوں میں راشن اور دیگر روزمرہ استعمال کی اشیاءتقسیم کیں۔ کانگریس اقلیتی شعبہ دہلی کے سکریٹری شفیع الرحمن نے کہا کہ دہلی کو اس وقت سیلاب کی پریشانی کا سامنا ہے، ایسے میںکانگریس کارکن متاثرہ علاقوں میں پہنچ کر فوری ضروریات کو پورا کر رہے ہیں۔
اس کے ساتھ ساتھ ہماری یہ بھی کوشش ہے کہ کارکنان متاثرہ علاقوں اور خاندانوں کے مقام اورصورتحال سے متعلق معلومات حکام کو بھیجتے رہیں تاکہ ان کی شناخت کرکے انہیں ضروری مدد فراہم کی جاسکے۔اس موقع پر کانگریس اقلیتی شعبہ دہلی کے چیئرمین عبدالواحد قریشی سمیت بڑی تعداد میں کارکنان موجود تھے۔
