نئی دہلی،14اپریل(ایچ ڈی نیوز)۔
ماڈل ولیج ٹرسٹ (ایم وی ٹی) جو ویژن 2026کی ذیلی تنظیموں میں سے ایک ہے نے ’اسمارٹ لائبریری فار اسپیشل چالڈ‘ کا افتتاح کیا۔ یہ لائبریری ادویت پریوار فاونڈیشن کے زیر انتظام اد ویت پبلک اسکول، غازی آباد میں قائم کی گئی ہے۔ یہ اسکول ذہنی معذوری، بصری اور سماعت سے محروم بچوں کو تعلیمی اور طبی خدمات فراہم کرتا ہے۔یہ منصوبہ ویژن 2026 کے اقدام کا ایک حصہ ہے تاکہ اسکولوں کو معذور طلباءکی ضروریات کو پورا کرنے میں مدد ملے۔
اس موقع پر غازی آباد کے سماجی بہبود افسر سدھیر سنگھ نے افتتاحی تقریب میں بطور مہمان خصوصی شرکت کی۔ ماڈل ولیج ٹرسٹ کے سی ای او نوفل پی کے۔ اور ادویت پریوار فاونڈیشن کے بانی وید مہیش دت بھی موجود تھے۔ اس منصوبے کو المہا فوڈ انٹرنیشنل نے اپنے (سی ایس آر) پروگرام کے تحت فنڈ فراہم کیاہے۔ اس پروگرام میں ماڈل ولیج ٹرسٹ کے پروگرام ہیڈ آصف انور بھی موجود تھے۔
