نئی دہلی،12 مارچ(ایچ ڈی نیوز)۔
بین الاقوامی نسائی ادبی تنظیم( بنات) کے زیر اہتمام غالب اکیڈمی بستی حضرت نظام الدین دہلی کے آڈیٹوریم میں شانداریک روزہ جلسہ کا اہتمام کیا گیا۔ اس موقع پر افتتاحی اجلاس کی صدارت پروفیسر شریف حسین قاسمی نے کی۔ بنا ت کی صدر ڈاکٹر نگار عظیم نے بنات کا تعارف پیش کیا۔نثری سیشن پروفیسر انور پاشا کی صدارت میں منعقد ہوا۔ جبکہ مشاعرے کی صدارت بنات کی نائب صدر محترمہ عذرا نقوی نے کی ۔ نظامت کے فرائض تسنیم کوثر بنات کی جنرل سیکریٹری نے انجام دئے۔
اس موقع پر بنات کی ممبرز نے اپنی نثری و شعری تخلیقات پیش کیں۔ اس پروگرام میں مہمانان کرام فاروق بخشی اور خورشید حیات نے بنات کی اولین پیشکش یادوں کے جھروکے کو اردو ادب میں گرانقدر اضافہ قرار دیا ۔ پروفیسر شریف حسین قاسمی نے اپنے صدارتی خطبے میں بنات کی تشکیل کو ایک تاریخی قدم قرار دیا ۔
عالمی یوم خواتین کے حوالے سے بنات نے فن داستان گوئ کی بازیافت کے لئے کوشاں فوزیہ داستان گو کو انکی خدمات کے اعتراف میں تمغۂ حسن کارکردگی سے نوازا۔ بھوپال، بہار، کشمیر ، مراد آباد، سنبھل، اعظم گڑھ ، علی گڑھ سے بنات کی ممبرز نے صبح گیارہ بجے سے شام چھ بجے تک بہت کامیابی سے جلسے کی کارروائی کو مکمل کیا۔
