اورنگ آباد،09اگست(ایچ ڈی نیوز)۔
8اگست بھارت کی تحریک آزادی کی تاریخ میں بڑی اہمیت کا حامل ہے۔ آج ہی کے دن 1942 میں قومی رہنماوں کی سرپرستی میں ’بھارت چھوڑو تحریک‘ کا آغاز ہوا تھا، جو ملک کے مکمل آزادی کو پیش خیمہ ثابت ہوئی۔ مہاتما گاندھی، مولانا ابوالکلام آزاد و دیگر رہنماؤں کی قیادت میں بمبئی سے یہ تحریک شروع ہوئی تھی،جس میدان سے یہ تحریک شروع ہوئی تھی اسے ’اگست کرانتی میدان‘ کے نام سے یاد کیا جاتا ہے۔
ان خیالات کا اظہار ریڈ اینڈ لیڈ فاؤنڈیشن کے صدر مرزا عبدالقیوم ندوی نے آج الہدی اردو پرائمری اسکول کے طالبات و اساتذہ سے خطاب کرتے ہوئے کہا انہوں نے یہ بھی کہا کہ آج 9/اگست ایک اور اہم دن ہے. جسے ہم نیشنل بک لورس ڈے یعنی ’کتابوں کے عاشقوں کا دن کہتے ہیں‘ جو نوجوانوں میں بہت مقبول ہے. آج کے دن کتابوں کے چاہنے والے آپس میں تبادلہ خیال کرتے ہیں کتابوں کا آپس میں لین دین کرتے ہیں، کتابوں پر باتیں کرتے ہیں۔ اسی مناسبت سے ریڈ اینڈ لیڈ فاؤنڈیشن کی جانب سے مریم مرزا محلہ محلہ لائبریری تحریک کے تحت جنگ آزادی سے متعلق قومی اردو کونسل برائے فروغ اردو زبان دہلی سے شائع بچوں کا مقبول رسالہ ماہنامہ بچوں کی دنیا کے کاپیاں بچوں میں تقسیم کی گئیں. اس موقع پر اسکول کی انچارج نادیہ باجی، منتجب الدین چشتی نے طلباءکی رہنمائی کی اور ریڈ اینڈ لیڈ فاؤنڈیشن کا شکریہ ادا کیا۔
