اترولہ / بلرام پور، 08 نومبر(قمر خان)۔
دیوالی کے مبارک موقع پر اترپردیش کانگریس اقلیتی شعبہ کے نائب صدر حسیب خان نے اترولہ اسمبلی حلقے میں ایک لاکھ مٹھائی کے ڈبے تقسیم کرکے لوگوں کو تہوار کی مبارک باد پیش کی۔ اس موقع پر علاقے کے لوگوں نے ان کا گرمجوشی سے استقبال کیا اور انہیں مٹھائی کھلا کر دیوالی کی مبارک باد دی۔ہر سال کی روایت کو برقرار رکھتے ہوئے حسیب خان نے اس مرتبہ بھی بڑی تعداد میں خواتین، مردوں اور علاقہ کے مکینوں میں مٹھائی تقسیم کی۔ اس دوران خواتین نے بھی انہیں دیوالی کی مبارک باد پیش کی اور ان کے لیے نیک تمناؤں اور دعاؤں کا اظہار کیا۔
اس موقع پر حسیب خان نے کہا کہ دیوالی محض روشنیوں کا تہوار نہیں، بلکہ یہ آپسی محبت، امن، بھائی چارے اور باہمی ہم آہنگی کا پیغام بھی دیتا ہے۔ انہوں نے کہا کہ تہوار لوگوں کو ایک دوسرے کے قریب لانے اور سماج میں محبت و اتحاد کو فروغ دینے کا ذریعہ بنتے ہیں۔انہوں نے دعا کی کہ اترولہ اسمبلی حلقے سمیت پورے ملک میں ہندو مسلم اتحاد، باہمی محبت اور بھائی چارے کی روایت ہمیشہ قائم و دائم رہے اور تمام لوگ ایک دوسرے کے تہواروں میں شریک ہوکر خوشیاں بانٹتے رہیں۔