جوہانسبرگ،19فروری(ایچ ڈی نیوز)۔
ایتھوپیا میں ہونے والے افریقی یونین کے سالانہ اجلاس سے اسرائیلی وفد کو باہر نکال دیا گیا۔غیر ملکی خبر رساں ادارے کے مطابق الجزائر اور جنوبی افریقہ نے اجلاس میں اسرائیلی وفد کی شرکت کی مخالفت کی تھی۔میڈیا رپورٹس کے مطابق اسرائیلی وفد کو افریقی یونین کانفرنس کے ادیس ابابا میں ہونے والے افتتاحی اجلاس سے باہر نکالا گیا ہے۔
اسرائیلی وفد کو مبصر کی حیثیت سے شرکت کے لیے دیا گیا دعوت نامہ منسوخ کر دیا گیا تھا۔دوسری جانب سے میڈیا رپورٹس کے مطابق اسرائیل اس واقعے کو سنجیدگی سے دیکھ رہا ہے۔واضح رہے کہ اسرائیل نے کئی دہائیوں کی سفارتی کوششوں کے بعد 2021ءمیں افریقی یونین میں مبصر کا درجہ حاصل کیا تھا۔
واضح رہے کہ اسرائیل نے مقبوضہ علاقہ میں مزید بستیاں بسانے کا اعلان کیا ہے۔جس کی وجہ سے پوری دنیا میں اس وقت اسرائیل کو تنقید کا سامنا ہے۔امریکہ نے بھی اسرائیل سے کہا کہ اسرائیل ایسا کوئی قدم نہ اٹھائے جو دو ریاستی حل کی راہ میں رکاوٹ بنے۔جبکہ سعودی عرب نے بھی اسرائیلی اعلان کی شدید مذمت کی ہے۔
