نئی دھلی،26 ستمبر(ایچ ڈی نیوز)۔
گزشتہ دنوں جمہوریت کی نئی عمارت پارلیمنٹ میں برسراقتدار جماعت کے رکن پارلیمنٹ کے ذریعے ایوان میں مسلم رکن کے تئیں نازیبا الفاظ اور مسلم قوم کی تذلیل کا معاملہ تھمتا نظر نہیں آرہا ہے ۔ اس بیچ آئی ایم سی آر کے چیٔرمین اور سابق رکن پارلیمنٹ محمد ادیب نے پسماندہ، پچھڑوں اور اقلیتوں بالخصوص مسلمانوں کی لڑائی کا دم بھرنے والے سیکولر لیڈروں کے سامنے بڑا سوال رکھ دیا ہے۔ انہوں نے حیرت کا اظہار کرتے ہوئے کہا کہ وزیراعظم جس ایوان کے لیڈر ہوں اور اسی ایوان میں ان کی ہی پارٹی کا لیڈر ایوان کی حرمت کو بالائے طاق رکھتے ہوئے جس زہریلی زبان کا استعمال ایک قوم کے لئےکر رہا ہے، اس پر سخت ایکشن کے بجائے صرف تنبیہ کیا جانااور وزیراعظم کا بھی اس پر خاموش رہنما نا صرف آئین کی حرمت کو پامال کرنا ہے بلکہ ملک میں نفرت انگیز ماحول کو مزید ہوا دینے کے مترادف ہے۔
محمد ادیب نے سیکولر سیاسی جماعتوں کے لیڈروں سے سوال کرتے ہوئے دریافت کیا کی، بی جےپی رکن نے جس زبان کا استعمال کیا ہے ۔ تنبیہ کے علاوہ اس کے خلاف اب تک کوئی کاروائی نہیں کی گئی ہے، ایسے میں سیکولر لیڈران جو اقلیتوں، پچھڑوں اور پسماندہ طبقات کی لڑائی کا دم بھرنے والے لیڈر بتائیں کہ وہ کس طرح سے اس ایوان میں بیٹھیں گے، جس ایوان میں ایسا زہریلا شخص بیٹھا ہو۔ انہوں نے کہا کہ اب وقت آگیا ہے کہ سیکولر لیڈروں کو اس نکتے پر سوچنا پڑے گا۔
محمد ادیب نے کہا کہ ایوان کے باہر نفرت انگیزی تو عام بات تھی مگر پارلیمنٹ اندر برسراقتدار جماعت کے رکن ذریعے اسی ایوان کے ایک ممبر کے ساتھ اس طرح سے گالی گلوج کیئے جانے کا واقعہ پارلیمنٹ کی تاریخ میں نہیں ملتا ہے ۔
انہوں نے کہا کہ کانگریس لیڈر راہل گاندھی متاثرہ مسلم رکن پارلیمنٹ کنور دانش علی کے گھر پہنچتے ہیں، ان سے ملاقات کر تے ہیں، اس عمل کی جتنی ستائش کی جائے وہ کم ہے۔ لیکن یہ ناکافی ہے۔ کیونکہ یہ صرف ایک رکن کے ساتھ پیش آیا ہوا واقعہ بھر نہیں ہے، یہ ملک کی ایک سو چالیس ارب لوگوں کی تذلیل ہے۔ ایسے میں ہم تمام سیکولر لیڈروں سے مطالبہ کرتے ہیں کہ وہ اس ایوان میں بیٹھنے سے گریز کرتے ہوئے کم از کم ایوان کا بائیکاٹ ضرور کریں۔
