چندرشیکھر آزاد ہوں گے وزارت اعلیٰ عہدہ کے امیدوار، اے آئی ایم آئی ایم اور آزاد سماج پارٹی نے 2027 کے اسمبلی انتخابات مل کر لڑنے کا کیا فیصلہ
نئی دہلی، 12 نومبر (ہماری دنیا نیوز): اترپردیش میں 2027 کے اسمبلی انتخابات سے قبل ریاست کی سیاست میں ایک نئی سیاسی پیش رفت سامنے آئی ہے۔ آل انڈیا مجلس اتحاد المسلمین (اے آئی ایم آئی ایم) کے سربراہ اور رکن پارلیمنٹ اسدالدین اویسی اور آزاد سماج پارٹی (کانشی رام) کے سربراہ و رکن پارلیمنٹ چندرشیکھر آزاد نے انتخابی اتحاد کا اعلان کردیا ہے۔ دونوں رہنماؤں نے لکھنؤ میں مشترکہ پریس کانفرنس کے دوران اپنے نئے سیاسی محاذ کا نام ’سماجی پریورتن مورچہ‘ رکھنے کا اعلان کیا۔ اس کے ساتھ ہی چندرشیکھر آزاد کو اس اتحاد کی جانب سے وزارت اعلیٰ کا امیدوار بھی قرار دیا گیا ہے۔
اس اتحاد کو اترپردیش کی سیاست میں ایک نئے سیاسی محاذ کے طور پر دیکھا جا رہا ہے۔ دونوں جماعتوں نے 2027 کے اسمبلی انتخابات میں مل کر حصہ لینے کا فیصلہ ایسے وقت میں کیا ہے جب ریاست میں حکمراں بھارتیہ جنتا پارٹی (بی جے پی) کے ساتھ سماجوادی پارٹی اور کانگریس کے سیاسی اتحاد کے درمیان مقابلے کی تیاری جاری ہے۔
اے آئی ایم آئی ایم اور آزاد سماج پارٹی کے اس اتحاد میں دلت اور اقلیتی طبقات کے مسائل، سیاسی نمائندگی اور حقوق کو اہم موضوع بنانے کی بات سامنے آئی ہے۔ دونوں جماعتیں ریاست میں ایک الگ سیاسی متبادل پیش کرنے کی کوشش کر رہی ہیں۔
سیٹوں کی تقسیم اور انتخابی حکمت عملی پر نظر
اتحاد کے اعلان سے پہلے دونوں جماعتوں کے درمیان کئی دور کی بات چیت ہوئی تھی۔ اسدالدین اویسی نے بھی اشارہ دیا تھا کہ دونوں جماعتیں مختلف اسمبلی حلقوں کا جائزہ لے رہی ہیں اور اس بات پر گفتگو جاری ہے کہ کون سی جماعت کہاں سے اپنا امیدوار میدان میں اتارے گی۔
تاہم دونوں جماعتوں کے درمیان سیٹوں کی حتمی تقسیم اور انتخابی حکمت عملی کی مکمل تفصیلات سامنے آنا ابھی باقی ہیں۔ اتحاد کو دیگر چھوٹی جماعتوں اور سیاسی شخصیات کے لیے بھی کھلا رکھنے کی بات کہی گئی ہے۔
قابل ذکر ہے کہ اسدالدین اویسی اس سے قبل اترپردیش میں سماجوادی پارٹی اور کانگریس کے ساتھ وسیع تر اپوزیشن اتحاد میں شامل ہونے کی خواہش ظاہر کرچکے تھے، لیکن ان کوششوں کو کامیابی نہیں ملی۔ اس کے بعد اے آئی ایم آئی ایم نے آزاد سماج پارٹی کے ساتھ مل کر انتخابی میدان میں اترنے کا فیصلہ کیا۔
اب ’سماجی پریورتن مورچہ‘ کے قیام کے بعد اترپردیش کے سیاسی منظرنامے میں ایک نئے اتحاد کی شمولیت ہوگئی ہے۔ آئندہ دنوں میں اس محاذ کی انتخابی حکمت عملی، امیدواروں کے انتخاب اور دیگر سیاسی جماعتوں کی ممکنہ شمولیت پر نگاہیں رہیں گی۔