نومبر 17, 2026
International بین الاقوامی خبریںSaudi Arabia سعودی عربTop News

مکہ مکرمہ اور مدینہ منورہ کو ڈرون اور میزائلوں سے نشانہ بنانا زمین میں سرکشی ہے: امام مسجد نبوی

شیخ صالح المغامسی کی حوثی حملوں کی شدید مذمت، کہا مقدس مقامات پر حملے کا ارادہ سب سے بڑی سرکشی، رابطہ عالم اسلامی نے بھی تشویش ظاہر کردی

ریاض،17 نومبر: امام مسجد نبوی شیخ صالح المغامسی نے مکہ مکرمہ اور مدینہ منورہ کو نشانہ بنانے کی کوششوں کی سخت مذمت کرتے ہوئے انہیں ’’بغی فی الارض‘‘ یعنی زمین میں سرکشی قرار دیا ہے۔ انہوں نے کہا کہ مقدس مقامات کو نقصان پہنچانے کا ارادہ کرنا انتہائی سنگین عمل ہے اور سرکشی و ظلم کا انجام ہمیشہ برا ہوتا ہے۔

العربیہ ڈاٹ نیٹ سے ٹیلی فون پر گفتگو کرتے ہوئے شیخ صالح المغامسی نے کہا کہ اللہ کے حرمت والے گھر، خانہ کعبہ اور رسول اللہ صلی اللہ علیہ وسلم کی مسجد یعنی مسجد نبوی کو نقصان پہنچانے کا ارادہ کرنا سب سے بڑی سرکشی ہے۔ ان کے مطابق حوثی ملیشیا نے بیک وقت دونوں مقدس مقامات کو نشانہ بنانے کی کوشش کرکے مسلمانوں کے جذبات کو مجروح کیا ہے۔

انہوں نے کہا کہ مقدس مقامات کی جانب بار بار ڈرون اور میزائل بھیجنے کی کوششیں اس بات کی عکاسی کرتی ہیں کہ حملہ آور کس قدر مایوسی اور اشتعال انگیزی کا مظاہرہ کر رہے ہیں۔ ایسے اقدامات نہ صرف اسلام کی تعلیمات اور اقدار کے منافی ہیں بلکہ دنیا بھر کے مسلمانوں کے مذہبی جذبات کو بھی ٹھیس پہنچاتے ہیں۔

شیخ صالح المغامسی نے سوال اٹھایا کہ جو لوگ بیت اللہ کا رخ کرنے والے مسلمانوں کو اپنے ہتھیاروں سے نشانہ بنانے کی کوشش کرتے ہیں، ان کے طرز عمل میں عقل، ہدایت اور ایمان کی کیا گنجائش باقی رہ جاتی ہے؟ انہوں نے مزید کہا کہ سعودی عرب کے امن و استحکام کو نقصان پہنچانے کی کوششیں کامیاب نہیں ہوں گی۔

امام مسجد نبوی نے اس بات پر بھی زور دیا کہ اللہ تعالیٰ نے اپنے حرمت والے گھر کے خلاف ظلم اور زیادتی کا ارادہ رکھنے والوں کے لیے سخت وعید بیان کی ہے۔ مقدس مقامات کا احترام تمام مسلمانوں کی مشترکہ ذمہ داری ہے اور ان کی سلامتی کو نقصان پہنچانے کی کوشش ناقابل قبول ہے۔

رابطہ عالم اسلامی کی مذمت

دوسری جانب رابطہ عالم اسلامی نے بھی مکہ مکرمہ کو نشانہ بنانے کی کوششوں کی شدید مذمت کی ہے۔ تنظیم کے مطابق حوثی ملیشیا کی جانب سے میزائلوں اور ڈرون طیاروں کے ذریعے مکہ مکرمہ اور سعودی عرب کے شہری علاقوں کو نشانہ بنانے کی کوششیں مقدس مقامات کی حرمت پامال کرنے اور دنیا بھر کے دو ارب سے زائد مسلمانوں کے جذبات کو مشتعل کرنے کے مترادف ہیں۔

رابطہ عالم اسلامی نے ان کارروائیوں کو قابل مذمت قرار دیتے ہوئے سعودی عرب کی سلامتی اور مقدس مقامات کے تحفظ کی اہمیت پر زور دیا۔

واضح رہے کہ میڈیا رپورٹ کے مطابق سعودی فضائی دفاع نے گزشتہ چند گھنٹوں کے دوران مکہ مکرمہ اور مدینہ منورہ کی جانب بھیجے گئے تقریباً پانچ ڈرون طیاروں کو مار گرایا تھا۔ سعودی حکام کے مطابق ملک کے دفاعی نظام کے ذریعے ان حملوں کو ناکام بنایا گیا۔

Related posts

مدھیہ پردیش میں چھ سال میں غائب ہوگئیں 2,69,500 خواتین

Hamari Duniya News

مہاراشٹر کارپوریشن الیکشن میں عمران پرتاپ گڑھی جہاں بھی پہنچے، وہاں وہاں کانگریس کو ملی کامیابی

Hamari Duniya News

شاہی عیدگاہ میں تین روزہ تبلیغی اجتماع کی تیاریاں تیز، حاجی عمران حسین نے افسران کو دیں ہدایات

Hamari Duniya News