نومبر 18, 2026
Delhi دہلیNational قومی خبریںTop News

تلنگانہ میں طلبہ اور حقوق انسانی کے کارکنوں کی حراست پر اے پی سی آر برہم، پولیس کارروائی کی جوابدہی کا مطالبہ

اسرائیلی دفاعی اور نگرانی کی کمپنیوں کے ساتھ ریاستی حکومت کے اشتراک پر بھی اٹھائے سوالات، اختلافِ رائے رکھنے والوں کو ہراساں کرنے کا سلسلہ بند کرنے کی اپیل

حیدرآباد، 17 نومبر(ہماری دنیا نیوز): تلنگانہ میں طلبہ اور حقوق انسانی کے کارکنوں کی مبینہ غیر قانونی حراست اور پولیس کی جانب سے ہراساں کیے جانے کے خلاف ایسوسی ایشن فار پروٹیکشن آف سول رائٹس (اے پی سی آر)، تلنگانہ نے سخت تشویش کا اظہار کیا ہے۔ اس سلسلے میں حیدرآباد کے بشیر باغ پریس کلب میں منعقدہ پریس کانفرنس میں مختلف سماجی تنظیموں، دانشوروں، صحافیوں اور شہری حقوق کے کارکنوں نے شرکت کرتے ہوئے ریاستی حکومت سے پولیس کارروائی کی جوابدہی طے کرنے اور شہریوں کے آئینی حقوق کے تحفظ کو یقینی بنانے کا مطالبہ کیا۔

پریس کانفرنس میں تلنگانہ حکومت اور ٹی ہب (T-Hub) کے ذریعے اسرائیلی دفاعی، نگرانی اور ٹیکنالوجی کمپنیوں کے ساتھ بڑھتے ہوئے اشتراک پر بھی سوالات اٹھائے گئے۔ مقررین نے کہا کہ ایسے وقت میں جب فلسطینی عوام اسرائیلی جارحیت اور مظالم کا سامنا کر رہے ہیں، اسرائیلی دفاعی اور نگرانی کی کمپنیوں کے ساتھ ریاستی حکومت کی شراکت داری تشویش کا باعث ہے۔

اے پی سی آر کے مطابق، 16 نومبر کو ٹی ہب اور تلنگانہ حکومت کے محکمہ اطلاعاتی ٹیکنالوجی، الیکٹرانکس و مواصلات کے اشتراک سے حیدرآباد میں ایک تجارتی پروگرام منعقد کیا گیا، جس میں اسرائیل کی 20 کمپنیوں نے حصہ لیا۔ ان میں دفاعی اور نگرانی کے شعبوں سے وابستہ کمپنیوں کی شرکت پر شہری حقوق کی تنظیموں نے اعتراضات ظاہر کیے تھے۔

طلبہ اور کارکنوں کی گرفتاری کا معاملہ

پریس کانفرنس میں بتایا گیا کہ اس پروگرام سے قبل 15 نومبر کی شب اور 16 نومبر کی علی الصبح تلنگانہ کے مختلف علاقوں میں پولیس نے ان طلبہ اور سماجی کارکنوں کی تلاش میں کارروائیاں کیں، جو اسرائیلی کمپنیوں کے ساتھ ریاستی حکومت کے اشتراک سے متعلق منعقدہ سابقہ پریس کانفرنس میں شریک ہوئے تھے۔

اے پی سی آر کے مطابق، نصف شب کے قریب میر چوک پولیس کی ایک ٹیم پرانے شہر کے چتا بازار، لکڑی کوٹ میں واقع ایس آئی او تلنگانہ کے دفتر پہنچی اور تنظیم کے ریاستی صدر فراز احمد کے بارے میں دریافت کیا۔ ان کی عدم موجودگی میں دفتر میں موجود دیگر ارکان پر ان سے رابطہ کرنے کے لیے دباؤ ڈالا گیا، تاہم پولیس نے اپنی آمد اور کارروائی کی وجوہات واضح نہیں کیں۔

بعد ازاں ایس آئی او کے اسٹیٹ کیمپس سکریٹری محمد تاج اور ریاستی سکریٹری تقی الدین زید کو حراست میں لے لیا گیا اور انہیں پوری رات پولیس تحویل میں رکھا گیا۔ اسی دوران نظام آباد میں ایس آئی او کے ایک عہدیدار کی رہائش گاہ پر بھی پولیس کے پہنچنے کی اطلاع دی گئی۔

ضلع عادل آباد کے اچوڑہ علاقے میں اے پی سی آر تلنگانہ کے اسٹیٹ کوآرڈینیٹر عمر فاروق کے گھر پولیس اہلکار پہنچے اور انہیں حراست میں لے لیا۔ تاہم، ایک وکیل کی مداخلت کے بعد انہیں رہا کر دیا گیا۔ اس کے علاوہ راجندر نگر اور سنگاریڈی میں بھی ایس آئی او کے ذمہ داران سے پولیس نے رابطہ کرکے انہیں متعلقہ پولیس اسٹیشنوں میں حاضر ہونے کی ہدایت دی۔

اے پی سی آر نے بتایا کہ میر چوک پولیس کی تحویل میں موجود دونوں ایس آئی او کارکنوں کو 16 نومبر کی علی الصبح اے آئی ایم آئی ایم کے رکن اسمبلی میر ذوالفقار علی کی مداخلت کے بعد رہا کیا گیا۔ تنظیم کے مطابق، ابتدا میں سینئر پولیس افسران نے ان کی رہائی سے انکار کیا، تاہم رکن اسمبلی کی جانب سے ذاتی ضمانت اور یقین دہانی فراہم کیے جانے کے بعد دونوں کارکنوں کو رہا کر دیا گیا۔

پولیس کارروائی اور اسرائیلی کمپنیوں سے اشتراک پر اعتراضات

پریس کانفرنس میں خالدہ پروین نے پروگرام کا آغاز کرتے ہوئے شرکاء اور مقررین کا تعارف کرایا اور پریس کانفرنس کے اغراض و مقاصد بیان کیے۔

کنّے گنٹی روی نے تلنگانہ کے مختلف عوامی مسائل، بالخصوص کسانوں کی مشکلات اور صنعتی شعبے کو درپیش چیلنجوں کی جانب توجہ مبذول کرائی۔ پروفیسر جی ہراگوپال نے ہندوستان کی تاریخی خارجہ پالیسی اور مظلوم اقوام کے ساتھ یکجہتی کی روایت کا ذکر کرتے ہوئے کہا کہ فلسطین کے معاملے میں ہندوستان کو اپنے تاریخی موقف اور اصولی ذمہ داریوں کو پیش نظر رکھنا چاہیے۔ انہوں نے سابق وزیر اعظم اندرا گاندھی کے دور میں فلسطینی رہنما یاسر عرفات کے ہندوستان دورے اور ان کے سرکاری اعزاز کے ساتھ استقبال کا حوالہ بھی دیا۔

سارہ میتھیوز نے گزشتہ دو روز کے واقعات اور اپنے ذاتی تجربات بیان کرتے ہوئے پولیس کارروائی اور کارکنوں کی حراست کے حالات کی تفصیلات پیش کیں۔ پروفیسر پدمجا شا نے حکومت کے سیکولر اور جمہوری اقدار سے متعلق دعوؤں اور عملی اقدامات کے درمیان تضاد کی نشاندہی کرتے ہوئے اسرائیلی کمپنیوں کے ساتھ اشتراک پر سوالات اٹھائے۔

اے پی سی آر تلنگانہ کے سکریٹری ڈاکٹر عثمان نے گزشتہ دو برسوں کے دوران ریاست میں پیدا ہونے والی صورت حال کا جائزہ پیش کیا۔ انہوں نے نفرت انگیز تقاریر، فرقہ وارانہ واقعات اور پولیس کی مبینہ زیادتیوں کے بڑھتے ہوئے خدشات پر تشویش ظاہر کرتے ہوئے کہا کہ آئینی حقوق، شہری آزادیوں اور جمہوری اقدار کا تحفظ کسی بھی جمہوری حکومت کی بنیادی ذمہ داری ہے۔

ایس آئی او کے سکریٹری حماد نے طلبہ کارکنوں کی حراست اور پولیس کارروائی سے متعلق واقعات کی ترتیب بیان کی، جبکہ ایس کیو مسعود نے ریاستی حکومت سے مطالبہ کیا کہ وہ معاملے کا سنجیدگی سے نوٹس لے اور پولیس کارروائی کے لیے جوابدہی طے کرے۔ انہوں نے کہا کہ اگر حکومت نے مناسب کارروائی نہیں کی تو اس معاملے کو قانونی اور آئینی راستوں سے آگے بڑھایا جائے گا اور ضرورت پڑنے پر عدالتوں سے بھی رجوع کیا جائے گا۔

آزادیٔ اظہار اور آئینی حقوق کے تحفظ پر زور

پریس کانفرنس میں شریک مقررین نے متفقہ طور پر مطالبہ کیا کہ حکومتی پالیسیوں پر سوال اٹھانے اور عوامی مفاد کے معاملات پر آواز بلند کرنے والے طلبہ اور سماجی کارکنوں کو ہراساں کرنے اور خوف زدہ کرنے کا سلسلہ بند کیا جائے۔ ان کا کہنا تھا کہ پُرامن احتجاج، آزادیٔ اظہار اور حکومت کے فیصلوں پر تنقید کرنا آئین ہند کے تحت شہریوں کے بنیادی جمہوری حقوق ہیں، جن کا تحفظ ہر حال میں ضروری ہے۔

اے پی سی آر تلنگانہ نے ایس آئی او تلنگانہ اور ان تمام کارکنوں کے ساتھ یکجہتی کا اظہار کیا جو انسانی حقوق، عوامی پالیسیوں اور حکومتی جوابدہی سے متعلق سوالات اٹھانے پر مبینہ دباؤ اور ہراسانی کا سامنا کر رہے ہیں۔ تنظیم نے حکومت سے اپیل کی کہ اختلافی آوازوں اور شہریوں کے خدشات کا جواب پولیس کارروائی کے بجائے جمہوری مکالمے اور آئینی طریقۂ کار کے ذریعے دیا جائے۔

اس مشترکہ بیان کی تائید کرنے والے 23 ممتاز سماجی و شہری حقوق کے نمائندوں میں خالدہ پروین، پروفیسر پدمجا شا، پروفیسر جی ہراگوپال، ایس کیو مسعود، سارہ میتھیوز، میرا سنگامیترا، سنجیو، محمد حماد الدین، کنّے گنٹی روی، سرینواس کوڈالی، این وینوگوپال، ڈاکٹر عثمان، جھانسی، ایس سیتا لکشمی، لِسی جوزف، روبینہ مظہر، ماریا تبسم، صبا قادری، شبھا پردیپ، ماجد شطاری، علی اصغر، ایم اے مجیب ایوب اور یاسمین آر شامل ہیں۔

Related posts

بغاوت کی آگ میں کیوں جھلس رہا ہے یوروپ ! آخر اپنی حکومتوں سے کیا چاہتے ہیں عوام؟

Hamari Duniya News

شاہین باغ میں شاندار محفلِ مشاعرہ، اردو کے فروغ کے لیے گھروں میں اردو بولنے پر زور

Hamari Duniya News

ڈائٹ میں معلمین کی عملی تحقیق کی تربیت اختتام پذیر

Hamari Duniya News