کیرانہ:20فروری(عظمت اللہ خان)۔ ریاستی انتخابی کمیشن کی ہدایات کے مطابق خصوصی گہری نظرِ ثانی (ایس آئی آر) مہم کے تحت آئندہ اتوار 22 فروری کو کیرانہ اسمبلی حلقہ کے ہر بوتھ پر کیمپ منعقد کرکے دعوے اور اعتراضات وصول کیے جائیں گے۔
کیرانہ اسمبلی حلقہ نمبر 08 کی انتخابی رجسٹریشن افسر (ای آر او)/ایس ڈی ایم نِدھی بھاردواج نے بتایا کہ ریاستی انتخابی کمیشن کی جانب سے اسپیشل انٹینسو ریویژن (ایس آئی آر) کا کام مکمل کرنے کے لیے 6 مارچ کی تاریخ مقرر کی گئی ہے۔ ایس آئی آر سے متعلق دعوے اور اعتراضات حاصل کرنے کے لیے آئندہ اتوار 22 فروری کو اسمبلی کے ہر بوتھ پر خصوصی کیمپ لگایا جائے گا۔
انہوں نے بتایا کہ اس موقع پر بوتھ لیول افسران صبح 10 بجے سے شام 4 بجے تک موجود رہیں گے اور فارم 06، 06 اے، 07 اور 08 سے متعلق ہر قسم کے دعوے اور اعتراضات وصول کریں گے، جب کہ شام 5 بجے تک موصولہ درخواستیں متعلقہ دفتر میں جمع کرائی جائیں گی۔ انہوں نے متعلقہ رائے دہندگان سے مقررہ مدت کے اندر اپنے دعوے اور اعتراضات پیش کرنے کی اپیل کی ہے۔