نئی دہلی،10نومبر(ایچ ڈی نیوز)۔
ورلڈ پیس ہارمنی اور انڈیا سیفی فرنٹ کے قومی صدر حاجی شکیل سیفی نے آج ملک کے وزیراعظم،وزیرداخلہ، دہلی کے لیفٹیننٹ گورنر اور دہلی پولس کمشنر کو خط لکھ کر دہلی میں بڑھ رہے نشے اور جرائم پر تشویش کا اظہار کرتے ہوئے ٹھوس قدم اٹھانے کا مطالبہ کیا ہے۔
حاجی شکیل سیفی نے کہا کہ باہری دہلی کے تحت نہال وہار، نانگلوئی کے گلی کوچوں میں اب کھلے عام نشہ خوری(اسمیک، چرس، گانجہ، افیم، نشے کی گولیاں وغیرہ بک رہی ہیں۔انہوں نے الزام عائد کیا کہ پولس صرف جرائم پیشہ سے ہفتہ وصولی، اپنے تحفظ میں سٹے بازوں کو چھوٹ دینا اور ناجائز شراب بیچنے والے عناصر کو چھوٹ دینے کا کام کررہی ہے اور ان سب سے لاکھوں روپے کی وصولی کی جارہی ہے۔ انہوں نے کہا کہ جب پولس ہی نوجوانوں کو نشے اور جرائم کی طرف دھکیل رہی ہے تو علاقے میں جرائم پر کنٹرول اورامن بحال کون کرے گا۔ علاقہ میں چاقو زنی، لوٹ پاٹ کے واقعات گزشتہ کچھ ہفتوں سے بے تحاشہ بڑھ رہے ہیں۔ اگر کوئی شکایت کرتا ہے تو یہ اس کی شبیہ بگاڑنے اور الٹے سیدھے کیسوں میں پھنسا کر مستقبل برباد کرنے کی دھمکی دیتے ہیں۔
شکیل سیفی نے کہا کہ میرے لئے ملک اور انسانیت کی فلاح پہلے ہے، جس کے آگے میں اپنے خاندان کو بھی کچھ نہیں سمجھتا۔ انہوں نے مطالبہ کیا کہ ملک اور دہلی کو چلانے والے ہمارے رہنما اس نشے اور جرائم پر کنٹرول کرکے امن کو بحال کریں۔
