نئی دہلی، 14 جولائی ۔
برمنگھم میں کھیلے گئے ورلڈ چمپئن شپ آف لیجنڈز کے فائنل میچ میں یوراج سنگھ کی قیادت میں انڈیا چیمپئنز نے پاکستان چیمپئنز کو پانچ وکٹوں سے شکست دے دی۔ ہندوستان نے اس ٹورنامنٹ کا پہلا خطاب اپنے نام کر لیا۔ اس میچ میں پاکستان نے ٹاس جیت کر پہلے بلے بازی کرتے ہوئے مقررہ 20 اوورز میں چھ وکٹوں پر 156 رن بنائے۔ پاکستان کی جانب سے شعیب ملک نے 41 رن کی طوفانی اننگز کھیلی۔ جواب میں بھارت نے امباتی رائیڈو کی نصف سنچری کی بدولت 19.1 اوورز میں پانچ وکٹوں پر 159 رن بنا کر خطاب اپنے نام کر لیا۔ 157 رنوں کے ہدف کے تعاقب میں اتری ہندوستانی ٹیم کی شروعات مضبوط رہی۔
رابن اتھپا اور امباتی رائیڈو کے درمیان پہلی وکٹ کے لیے 34 رن کی شراکت ہوئی۔ تیسرے نمبر پر بلے بازی کرنے آئے سریش رائنا بھی کچھ خاص نہیں کر سکے اور چار رن بنانے کے بعد پویلین لوٹ گئے۔
اس کے بعد گرکیرت سنگھ مان نے مورچہ سنبھالا اور دو چوکوں اور ایک چھکے کی مدد سے 34 رنوں کی اننگز کھیلی۔ یوسف پٹھان نے 30 رن بنائے۔ وہیں یوراج 15 رن بنا کر ناٹ آوٹ رہے اور عرفان پانچ رن بنا کر ناٹ آٹ رہے۔ پاکستان کی جانب سے عامر نے دو جبکہ سعید اجمل، وہاب ریاض اور شعیب ملک نے ایک ایک وکٹ حاصل کی۔