Uttarakhand Nurse Rape Case جمعیۃعلماء ہند کی کوشش کامیاب، تسنیم جہاں معاملہ پر سپریم کورٹ میں سماعت آج

Uttarakhand Nurse Rape Case

مولانا ارشدمدنی کی ہدایت پر اتراکھنڈکی مسلم نرس کو انصاف دلانے کے لئے جمعیۃعلماء ہند نے سپریم کورٹ کا دروازہ کھٹکھٹایا
آج اس اہم مقدمہ کی سماعت چیف جسٹس آف انڈیا کی سربراہی میں تین رکنی بینچ کریگی
نئی دہلی 12/ستمبر: اترا کھنڈ کے رودرپور کی رہنے والی مسلم نرس کے قتل کا معاملہ اب سپریم کورٹ پہنچ گیا ہے،صدر جمعیۃ علماء ہند مولانا ارشد مدنی کے تعاون سے متوفیہ کی بیٹی اور بہن نے سپریم کورٹ آف انڈیا میں ایک پٹیشن داخل کرکے چیف جسٹس آف انڈیا سے قتل کے اس مقدمہ کی سی بی آئی انکوائری اور متاثرین کو معاوضہ دیئے جانے کی درخواست کی ہے۔موصولہ اطلاعات کے مطابق اس اہم مقدمہ کی سماعت چیف جسٹس آف انڈیا کی سربراہی والی تین رکنی بینچ 13/ ستمبر جمعہ کے دن کریگی،چیف جسٹس آف انڈیا ڈی وائی چندر چوڑ، جسٹس جے بی پاردی والا اور جسٹس منوج مشراء اس مقدمہ کی سماعت کریں گے۔

Uttarakhand Nurse Rape Case

سپریم کورٹ آف انڈیا میں داخل پٹیشن کو سینئر ایڈوکیٹ نتیا راما کرشنن کے مشورہ سے ایڈوکیٹ صارم نوید اور ایڈوکیٹ شاہد ندیم نے تیار کیا ہے جبکہ ایڈوکیٹ آن ریکارڈ سوگندھا آنندنے ہے۔پٹیشن میں عدالت سے درخواست کی گئی ہے کہ وہ ایف آئی آر نمبر 406/2024رودر پور پولس اسٹیشن کی مرکزی تفتیشی ایجنسی سے آزادانہ تحقیقات کرائے نیز متوفیہ کی کمسن بچی کو معاوضہ دینے کے لئے ریاستی حکومت کو حکم جاری کرے۔ عدالت سے قومی سطح پر میڈیکل اسٹاف کی حفاظت کے لئے قومی سطح پر گائیڈلائنس تیار کئے جانے کی بھی درخواست کی گئی ہے۔عرض داشت کو متوفیہ کی کمسن بچی ضیاء ملک (بذریعہ نانا)اور بہن صاحبہ جہاں کے ذریعہ سپریم کورٹ میں داخل کیا ہے۔پٹیشن میں یونین آف انڈیا، منسٹری آف چائلڈ اور وومن اور اسٹیٹ آف اتراکھنڈ کو فریق بنایا گیا ہے۔ آئین ہند کے آرٹیکل 32 کے تحت داخل پٹیشن میں تحریر کیا گیا ہے کہ 30 جولائی کو اسپتال سے واپس آتے ہوئے متوفیہ لاپتہ ہوگئی تھی جس کی رپورٹ پولس میں درج کرائی گئی لیکن پولس نے ان کی رپورٹ پر کوئی کارروائی نہیں کی بلکہ 8 جولائی کو اس وقت کارروائی شروع کی گئی جب ایک سڑا گلا انسانی ڈھانچہ بر آمد ہوا۔لاش کی شناخت اس کے پاس سے بر آمد موبائل کی وجہ سے ہوئی اور پھر ایک ملزم کی راجستھان سے گرفتاری بتائی گئی۔ پولس نے ایسے شخص کو گرفتار کرنے کااعلان کیا جو پہلے سے پولس تحویل میں تھا اور جو نشے کا عادی ہے۔پٹیشن میں مزید تحریر کیا گیا کہ پولس نے ان کی شکایت پر کئی دنوں تک کارروائی نہیں کی اور انہیں پولس اسٹیشن کے درجنوں چکر لگانے پڑے۔

Uttarakhand Nurse Rape Case

پولس نے عوامی غصہ اور احتجاج کے بعد ایف آئی آر درج کی۔ابتک کی پولس کی کارروائی مشکوک ہے لہذا عدالت کو اس مقدمہ کی تفتیش مرکزی تفتیشی ایجنسی سے کرانا چاہئے تاکہ ہمیں انصاف مل سکے۔پولس کی جانب سے درج کی گئی ایف آئی آر میں یہ کہیں درج نہیں کیا گیا ہے کہ انہیں متوفیہ کی لاش کا ڈھانچہ کیسے ملا جبکہ متوفیہ کے گھر والے متوفیہ کو ایک ہفتہ سے زائد عرصے سے اسی جگہ تلاش کررہے تھے جہاں سے پولس نے لاش ملنے کا دعوی کیا ہے۔پٹیشن میں مزید تحریرہے کہ پوسٹ مارٹم رپوٹ بھی موت کس وجہ سے ہوئی واضح نہیں کرسکی ہے کیونکہ متوفیہ کی لاش اتنی زیادہ سڑ گل چکی تھی پوسٹ مارٹم کرنے کے لئے کچھ بچا ہی نہیں تھا۔پٹیشن میں مزید تحریر کیا گیا ہے کہ مقامی پولس کی جانب سے کی جانے والی تفتیش جس رخ پر جارہی ہے انہیں انصاف ملنے کی امید نظر نہیں آرہی ہے۔ پولس نے عوامی غصہ کو دبانے کے لئے خاطی کو گرفتار کرنے کا دعوی کیا ہے جبکہ یہ ایک منظم سازش کے تحت عصمت دری کے بعد قتل کئے جانے کا معاملہ ہے۔واضح رہے کہ 23/ اگست 2024کو مولانا ارشد مدنی کی ہدایت پر جمعیۃ علماء ہندقانونی امداد کمیٹی کے وکلاء کے ایک وفد نے گدر پور کا دورہ کرکے متوفیہ کے اہل خانہ سے ملاقات کی تھی اور انہیں ہر طرح کی قانونی مددکرنے کی یقین دہانی کرائی تھی۔ وفد میں ایڈوکیٹ شاہد ندیم، ایڈوکیٹ مجاہد احمد، ایڈوکیٹ راج و دیگر شامل تھے۔

گوگل نیوز پر ہمیں فالو کریں