علی گڑھ، 07 نومبر (ایچ ڈی نیوز)۔
گزشتہ کئی برس سے ریاست کے علی گڑھ ضلع کا نام بدلنے کی کوششیں کی جا رہی ہے، جس کے نتائج اب سامنے آ رہے ہیں۔ منگل کو علی گڑھ میونسپل کارپوریشن میں ایک قرارداد منظور کی گئی، جس میں کہا گیا کہ علی گڑھ کا نام بدل کر ہری گڑھ رکھا جائے۔
فی الحال علی گڑھ میونسپل کارپوریشن میں علی گڑھ کا نام بدل کرہری گڑھ کرنے کی تجویز پاس کی گئی ہے، جسے اب حکومت کو بھیجنے کی تیاری کی جا رہی ہے۔ علی گڑھ کے میئر پرشانت سنگھل کا کہنا ہے کہ انہیں امید ہے کہ حکومت جلد ہی اس کی منظوری دے گی۔ میئر نے بتایا کہ ایوان کی میٹنگ میں ایک کونسلر کی طرف سے علی گڑھ کا نام بدل کر ہری گڑھ کرنے کی تجویز پیش کی گئی تھی جس پر تمام کونسلروں نے متفقہ طور پر رضامندی دی ۔
