ماسکو: روس اور یوکرین کے درمیان جنگ شروع ہوئے کئی مہینوں کا عرصہ گزر چکا ہے دونوں ممالک کی جانب سے فوجیوں سمیت لاکھوں افراد کی موت واقع ہوچکی ہے۔ اور دونوں ممالک جنگ میں ایک دوسرے کو شکست دینے کے لئے طرح طرح کے حربے استعمال کررہے ہیں۔ اسی درمیان روس نے الزام عائد کیا ہے کہ یوکرین نے جنوب مشرقی علاقے زاپوریزہیا میں تعینات سینکڑوں روسی فوجیوں کو زہر دے دیا ہے۔
روسی وزارت دفاع کے مطابق 31 جولائی کو متعدد فوجیوں کو تشویش ناک حالت میں ملٹری اسپتال منتقل کیا گیا، ٹیسٹ کے ذریعے ان کے جسموں سے زہریلا مادہ ’بوٹولینم ٹاکسن ٹائپ بی‘ برآمد ہوا ہے۔روس نے الزام عائد کیا ہے کہ فوجیوں کو زہر دینے کی منظوری یوکرین کے صدر زیلنسکی کی جانب سے دی گئی تھی۔
دوسری جانب غیر ملکی خبر ایجنسی کے مطابق کے یوکرین کی وزارت داخلہ کے ایک مشیر نے روسی بیان پر ردعمل دیتے ہوئے کہا ہے کہ روس نے اپنے فوجیوں کو مضر صحت کھانا فراہم کیا جس سے ان کی طبیعت بگڑ گئی۔واضح رہے کہ روس اور یوکرین کے درمیان کچھ عرصے سے کشیدگی برقرار ہے، روس نے فوجی طاقت کے ذریعے یوکرین کے کئی اہم علاقوں پر کنٹرول حاصل کر رکھا ہے۔
