نئی دہلی(ایچ ڈی نیوز)۔
بھارت ، نیپال اور چین میں منگل کی دیر رات1:57بجے زلزلہ کے تیز جھٹکے محسوس کئے گئے۔ زلزلے کی شدت کے سبب نیپال میں گھر گرنے اور دیگر واقعات میں 8 افراد جاں بحق ہوگئے۔
زلزلہ پیما مرکز نے اس کی شدت 6.3 ریکارڈ کی۔ بھارت میں دہلی، اترپردیش،بہار،اتراکھنڈ، مدھیہ پردیش،ہماچال پردیش اور جموں وکشمیر کے کئی شہروں میںزلزلے کے جھٹکے محسوس کئے گئے۔ زلزلے کا مرکز نیپال تھا جبکہ اس کی گہرائی 10 کلومیٹر تھی۔
زلزلے کے شدید جھٹکوں کی وجہ سے لوگ اپنے گھروں سے باہر نکل آئے، مختلف علاقوں میں گھروں کی چھتیں گرنے سے متعدد افراد زخمی بھی ہوئے ہیں۔سب سے زیادہ تباہی کی خبریں نیپال سے سامنے آرہی ہیں۔یہاں کے دوتی میں ایک گھر گرنے سے چھ افراد کی موت ہوگئی ہے۔ اتراکھنڈ کے پتھیورا گڑھ میں بدھ کی صبح6:27پر زلزلہ کے جھٹکے محسوس کئے گئے۔ اس کی شدت پیما مرکز نے4.3ریکارڈ کی ہے۔ نیپال کے نیشنل سیسمولوجیکل سینٹر نے تصدیق کی ہے کہ نیپال میں گزشتہ 24 گھنٹوں میں تیسری مرتبہ زلزلے کے جھٹکے محسوس کیے گئے ہیں۔
