طارق صدیقی نے بڑھتی ہوئی فضائی آلودگی پرتشویش کا اظہار کرتے ہوئے کہا کہ دونوں حکومتیں عوام کی صحت سے کھیل رہی ہیں
نئی دہلی، 09 نومبر (ایچ ڈی نیوز)۔
دہلی مائنارٹیز ویلفیئر فیڈریشن کے چیئر مین وکانگریس کے سینئر لیڈر طارق صدیقی نے ایک پریس بیان میں دہلی این سی آر میں گزشتہ چند ہفتوں سے بڑھتی ہوئی آلودگی (گیس چیمبر) پر سخت ردعمل ظاہر کرتے ہوئے کہا کہ ہر شخص روزانہ 10 سے 20 سگریٹ پیتا ہے۔ انہوں نے کہا کہ دہلی این سی آر کی زہریلی آب و ہوا کو ڈاکٹروں (ماہرین) نے بہت خراب قرار دیا ہے، کیونکہ اب معصوم بچے اور بوڑھے لوگ سنگین مسائل سے دوچار ہیں، لوگ آنکھوں اور سانس کی بیماریوں، الرجی وغیرہ سے جدوجہد کر رہے ہیں۔ طارق صدیقی نے مزید کہا کہ خراب موسم کی وجہ سے دارالحکومت اور اس کے آس پاس کی ریاستوں میں گزشتہ چند ہفتوں سے آلودگی آسمان کی بلندی پر ہے اور دہلی آلودہ دھوئیں میں گھرا ہوا ہے۔ ایسے میں دہلی حکومت کوئی ٹھوس قدم اٹھانے میں ناکام ثابت ہو رہی ہے اور صرف بیانات اور الزامات لگا رہی ہے۔
صدیقی نے کہا کہ انہیں دہلی کے لوگوں کو وہاں کی بگڑتی ہوا سے بچانے پر توجہ دینی چاہیے۔ صدیقی نے کہا کہ اگر کیجریوال کو حکومت چلانے میں مشکلات کا سامنا ہے تو انہیں کانگریس کی شیلا سرکار کے 15 سال کے اقتدار سے سبق سیکھنا چاہئے کیونکہ ان کے دور حکومت میں ایسا کبھی نہیں ہوا۔انہوں نے کہا کہ دہلی میں آلودگی کی ذمہ داری لیں اور بحران کے اس وقت شہریوں کی حفاظت کریں۔
دہلی چھوڑ کر دوسری ریاستوں میں جاکر ا لیکشن کی تشہیرکرنا غیرذمہ داری کی علامت ہے۔ اگر آپ کو دہلی کی حکومت چلانے میں کوئی مسئلہ درپیش ہے تو تجربہ کار اور ماہرین سے پوچھ لیں، وہ بھی آپ کی مدد کرنے اور دہلی کے معصوم لوگوں کے مفاد میں کام کرنے میں بہت خوش ہوں گے۔انہوں نے کہا کہ کیونکہ کیجریوال کی حکومت میں ہر سال نومبر کے مہینے میں دہلی کے عوام بڑھتی ہوئی آلودگی سے متاثر ہوتے ہیں اور حکومت کئی بڑے اعلانات کرتی ہے، لیکن زہریلا دھواں لوگوں کی سانسوں پر بھاری ہے اور ہر کسی کی آنکھوں میں جلن اور سنگین بیماریاں ہیں۔ جب کہ ٹھوس اقدامات کی فوری ضرورت ہے لیکن دہلی حکومت اس مسئلے کو حل کرنے یا کوئی ٹھوس حل تلاش کرنے میں ناکام رہی ہے۔
