نئی دہلی، 27 دسمبر:مرکز جماعت اسلامی ہند کے شوریٰ ہال میں مولانا سید ابو الاعلی مودودی رحمہ اللہ کی مشہور تفسیر تفہیم القرآن کے ہندی ترجمہ کے ایپ کے اجرا کی تقریب جناب سید سعادت اللہ حسینی امیر جماعت اسلامی ہند کی صدارت میں منعقد ہوئی – ہندی ترجمہ قرآن اپلیکیشن کی تیاری کا یہ کام جماعت اسلامی ہند کے ادارہ ’اسلامی ساہتیہ ٹرسٹ‘ کے ذریعے انجام دیا گیا ہے۔ امیر جماعت اسلامی ہند سید سعادت اللہ حسینی کے ہاتھوں اپلیکیشن کا اجراء کیا گیا، اس موقع پر تفہیم القرآن کے ہندی مترجم جناب نسیم غازی فلاحی، نائب امیر جماعت، ملک معتصم خان، مولانا انیس الرحمن قاسمی، سابق ناظم، امارت شریعہ بہار، ٹرسٹ کے ذمہ داران و دیگراہم شخصیات نے بھی اجراء کی اس تقریب سے خطاب کیا۔
جناب یوسف امین جنھوں نے یہ ایپ تیار کی ہے نے ایپ کے اہم فیچرس کا تعارف پیش کیا۔ اس ایپ میں پورے قرآن مجید کی تلاوت ، اس کا ہندی ترجمہ اور تفہیم القرآن کی تفسیر کو شامل کیا گیا ہے – ایپ کے ذریعے ترجمہ اور تفسیر دونوں پڑھے جا سکتے ہیں، ہندی آڈیو ترجمہ بھی اس ایپ کی ایک اہم خصوصیت ہے ۔
تفہیم القرآن کے ہندی مترجم مولانا نسیم احمد غازی فلاحی نے بتایا کہ ترجمے کے اس کام میں 12 برس لگے- ترجمے کے ساتھ قرآنی اصطلاحات کی مختصر تشریح اور احادیثِ نبوی کے حوالے بھی شامل کیے گئے ہیں۔ مولانا انیس الرحمٰن قاسمی سابق ناظم امارت شرعیہ بہار و نائب صدر آل انڈیا ملّی کونسل نے ترجمے کے کام کی نزاکت اور حساسیت پر گفتگو کرتے ہوئے اس کام میں شامل افراد کو مبارکباد پیش کی-.
ڈاکٹر رضی الاسلام ندوی، نیشنل سکریٹری شرعیہ کونسل، جماعت اسلامی ہند نے کہا کہ ’’ میرا ماننا ہے کہ یہ کام صدقۂ جاریہ ہے ، اس میں جن لوگوں نے بھی کسی طرح کا تعاون پیش کیا ہے وہ سب اجر کے مستحق ہیں۔‘‘
جناب ملک معتصم خاں نائب امیر جماعت نے بھی اس کام پر خوشی کا اظہار کیا اور ٹرسٹ کے ذمے داروں کو مبارک باد پیش کی۔ ٹرسٹ کے چیئرمین جناب فرحت حسین نے بتایا کہ تلخیص تفہیم القرآن ، جسے مولانا صدر الدین اصلاحی نے تیار کیا تھا ، اس کا ہندی ترجمہ مولانا کوثر یزدانی ندوی نے کیا تھا ، اسے بھی اس ایپ میں شامل کردیا گیا ہے – انھوں نے فرمایا کہ ٹرسٹ نے دینی کتابوں کو بھی ڈیجیٹل شکل میں لانے کا منصوبہ بنایا ہے –
آخر میں محترم امیر جماعت نے صدارتی کلمات پیش کیے – انھوں نے ٹرسٹ کے ذمے داروں اور ایپ ڈیولپ کرنے والے نوجوان یوسف امین کو مبارک باد پیش کی – آپ نے فرمایا کہ مولانا مودودی نے تفسیر لکھنے میں بہت محنت کی ہے – تفہیم القرآن کی تیاری کے ضمن میں مولانا نے جرمن زبان سیکھی ، ہندو مت اور عیسائیت کی بنیادی کتابوں کا باریکی سے مطالعہ کیا ، دیگر افکار و نظریات کا بھی ناقدانہ جائزہ لیا اور انتہائی تحقیق کے ساتھ تفسیر لکھی – آپ نے فرمایا کہ الحمد للہ اسلامی ساہتیہ ٹرسٹ کے ذریعے یہ بہت اہم کام انجام پایا ہے – اب ہماری ذمے داری ہے کہ اسے زیادہ سے زیادہ عام کرنے کی کوشش کریں ، تاکہ یہ نہ صرف مسلمانوں تک پہنچے ، بلکہ ہندی زبان جاننے والے ہر شخص تک اس کی رسائی ہو ۔اس ایپ کو انڈرائیڈ اور آئی او ایس پر انسٹال کیا جاسکتا ہے – اسے پلے اسٹور میں جاکر تفہیم القرآن ہندی ٹائپ کرکے ڈاؤن لوڈ کیا جاسکتا ہے یا درج ذیل لنک کے ذریعے بھی ڈاؤنلوڈ کیا جا سکتا ہے۔
Link for Android Users
https://play.google.com/store/apps/details?id=com.fenzy_seller
Link For iOS (Apple) User
https://apps.apple.com/in/app/tafheemul-quran-hindi/id6739448995
