کراچی ،28فروری(ایچ ڈی نیوز)۔
پاکستان سپرلیگ تمام تنازعات کے بعد بھی اپنے آب وتاب کے ساتھ جاری ہے اور میدان پر خوب دلچسپ میچ دیکھنے کو مل رہے ہیں۔ عام طور پر عبداللہ شفیق کو ٹیسٹ میچوں کا بلے باز سمجھا جاتا ہے۔ لیکن پاکستان سپر لیگ میں لاہور قلندرز کی جانب سے انہوں نے پشاور زلمی کے خلاف قہر برپا کردینے والی بلے بازی کی۔انہوں نے 41 گیندوں پر75رنز بنائے جس میں پانچ چھکے اور پانچ چوکے شامل تھے۔ پھر پیر کو اسلام آباد یونائیٹڈ کے خلاف ایک اور عمدہ اننگز کھیلتے ہوئے 24 گیندوں پر دوچھکوں اور چار چوکوں کی مدد سے 45 رنز اسکور کرکے سب کو حیران کردیا ہے۔
قبل ازیں پریس کانفرنس میں انہوں نے کہا کہ کوئی بھی بلے بازفاسٹ بولر شاہین آفریدی کا مقابلہ نہیں کرنا چاہتا میں خوش قسمت ہوں کہ شاہین آفریدی کا سامنا نہیں کرنا پڑتا۔ مجھے خوشی ہے کہ میں نے ٹیم کی جیت میں اپنا حصہ ڈالا۔ شاہین آفریدی تمام کھلاڑیوں کو بیک کرتے ہیں، امید ہے آئندہ بھی اچھی کارکردگی ہو گی۔ مجھے چانس ملا تو بس یہی سوچا تھا کہ اپنا بہترین دوں۔
قذافی اسٹیڈیم میں نئی پچز بنی ہیں شروع میں کھیلنا آسان نہیں تھا لیکن بعد میں اچھی بیٹنگ ہوئی۔ انہوں نے کہا کہ پریشر رہتا ہے لیکن مثبترہنے کی کوشش کرتا ہوں۔ قلندرز انتظامیہ کی جانب سے بہت زیادہ اعتماد دیا جاتا ہے۔
