ناگپور،(محمد نعیم شیخ):ناگپور کے انجمن انجینئرنگ کالج میں نئی قومی تعلیمی پالیسی اور نیشنل کریکولم فریم ورک پر اساتذہ کے ایک سیمینار کا انعقاد کیاگیا۔ مقرر خصوصی سید تنویر احمد (ماہر تعلیم، ڈایریکٹر ہولسٹک ایجوکیشن بورڈ، جے ائی ایچ، نئی دہلی) نے نئی تعلیمی پالیسی اور کریکولم فریم ورک پر اپنے خیالات کا اظہار کرتے ہوئے کہا کہ موجودہ دورتبدیلیوں کا دور ہے، ہر شعبہ کی طرح شعبہ تعلیم کی ترقی بھی جدید طریقہ تدریس اور ٹیکنالوجی کے استعمال کی متقاضی ہے۔ اساتذہ کو اس ضمن میں اپنی صلاحیتوں کو پروان چڑھانے اور جدید تعلیمی تقاضوں سے آراستہ ہونے کی ضرورت ہے۔ ساتھ ہی اخلاقی تنزلی کے اس دور میں طلبہ میں اخلاقی اقدار کو پروان چڑھاکر انھیں تعلیم کے حقیقی مقصد سے روشناس کرانا انتہائی ضروری ہے۔
اس موقع پر آپ نے نئی تعلیمی پالیسی اور کریکولم۔فریم ورک کی مختلف شقوں پر سیر حاصل گفتگو کی۔ پروگرام کا اغاز زاہد انور (صدر آئیٹا کامٹی یونٹ) کی تلاوت سے ہوا۔ محمد ضیاء الدین (صدر آئیٹا ناگپور) نے آئیٹا کا تعارف اور غرض و غایت بیان کی۔ تقریب کی صدارت سید شریف(ریاستی صدر آئیٹا مہاراشٹر) نے فرمائی۔ صدارتی خطبہ میں اپ نے حدیث کے حوالے سے اساتذہ کو زمانہ شناس ہونے اور احساس ذمہ داری پیدا کرنے تلقین کی۔ ریاض الخالق (نائب صدر آئیٹا مہاراشٹر) نے پاور پوائنٹ کے ذریعہ آئیٹا مہاراشٹر کی سرگرمیوں کو موثر انداز میں پیش کیا۔ محترمہ شائقہ نے شکریہ کا فریضہ انجام دیا۔ پروگرام کو کامیاب بنانے میں ساجد خان (ضلعی صدر آئیٹا ناگپور)، جاوید میاں دیشمکھ، صفیہ انجم، نصرت خالد صاحبہ، ابرار خان ، منیر ذکی، سہیل شکلگار، عبدالعلیم و دیگر معاونین کا بھرپور تعاون حاصل رہا۔
