ہم صرف آشیانہ نہیں بناتے بلکہ ٹوٹے ہوئے دلوں کو بھی جوڑتے ہیں: مولانا محمود اسعد مدنی
نئی دہلی ،۰08 دسمبر(ایچ ڈی نیوز)۔
جمعرات کو ایک مختصر تقریب میں جمعیۃ علماء ہند کے ذریعہ تعمیرکردہ ’ ظفر الدین نگر ‘ کالونی (واقع فیروز پورجھرکہ ) کا افتتاح عمل میں آیا ۔ یہ کالونی فساد اور بلڈوزر متاثرین کے لیے وقف ہے ۔ اس موقع پر ناظم عمومی جمعیۃ علماء ہند مولانا حکیم الدین قاسمی، جمعیت علماء ہند یوکے کے چیئرمین مولانا سعید احمد اور الحاج بشیر نے احمد بھائی ، طیب بھائی اور ان کی ہمشیرہ کو مکانات کی چابی سونپی.
اپنے خطاب میں مولانا حکیم الدین قاسمی نے صدر جمعیۃ علماء ہندمولانا محمود اسعد مدنی کے زیر قیادت جمعیۃ کی ملی وقومی خدمات کا تعارف پیش کیا اور بتایا کہ جمعیۃ علماء، میوات فساد متاثرین کی بازآبادکاری کے علاوہ قانونی مدد بھی کررہی ہے ۔انھوں نے کہا کہ جمعیۃ علماء ہند انسانیت کی بنیادپر کام کرتی ہے۔ ابتداہی سے اس کانظریہ اور اس کی سوچ یہی رہی ہے کہ ملک و ملت دونوں کی تعمیر کی جائے اور اس نے اپنے سو سال کے سفر میں اس کو عملی طور پر ثابت کیا ہے ۔ انھوں نے بتایا کہ یہ کالونی جمعیۃ علماء صوبہ دہلی کے سابق صدر اور مدرسہ با ب العلوم جعفرآباد کے بانی مولانا مفتی ظفر الدین صاحب ؒ کے نام سے موسوم ہے۔ مولانا موصوف اصلاً میوات کے مہوں کے رہنے والے تھے ۔
مولانا حکیم الدین قاسمی نے اس موقع پر صدر جمعیۃ علماء ہند مولانا محموداسعد مدنی کا پیغام سنایا کہ’’ ہم متاثرین کی مدد کرکے صرف ان کے لیے آشیانہ ہی نہیں بناتے بلکہ ان کے ٹوٹے بکھرے ہوئے دلوں کو بھی جوڑتے ہیں۔ انسان کی زندگی میں سب سے مشکل وقت تب آتا ہے جب اس کا گھر اچانک توڑ دیا جائے ، اس شکل میں ایک فرد نہیں بلکہ ایک خاندان متاثر ہوتا ہے۔مگر افسوس ہے کہ ہندستان جیسی فلاحی ریاست میں سرکار اور ایجنسی اپنی ناکامی کو چھپانے کے لیے ایساقدم اٹھاتی ہے جس سے بین الاقوامی سطح پر ملک کو ندامت کا سامنا کرنا پڑتا ہے ۔‘‘
مولانا مدنی نے جمعیۃ میوات ریلیف کمیٹی اور دیگر لوگوں کا شکریہ ادا کیا، جن کی شب روز محنت کا یہ ثمرہ ہے ۔خیر خواہی اور انسانیت دوستی کے عمل میں شریک ہونے والے افراد عنداللہ ماجور ہوں گے ( ان شاء اللہ )۔ انھوں نے لوگوں سے صبر واستقامت اور رجو ع الی اللہ کی تلقین کی اورمشورہ دیا کہ اپنے نسل کے دین و ایمان کی حفاظت کے لیے اپنے علاقوں میں مکتب قائم کریں ۔ مولانا مدنی نے کہا کہ ایک کارگر اور مفید سماج کی تعمیر اس کے بغیر ممکن نہیں ہے کہ ہم اپنی نسل کو اچھا انسان بنائیں ۔
آج جب متاثرین کو مکانات کی چابی سونپی جارہی تھی ، تو اس وقت متاثرین کادل بھر آیا، انھوں نے چار ماہ پہلے اپنے مکات ٹوٹتے دیکھا تھا ، دوبارہ گھر پا کر ان کی خوشی کی انتہاء نہ تھی ۔اس موقع پر جمعیۃ علماء ہند یو کے کے چیئرمین مولانا سعید احمد ،الحاج بشیر احمد تمول بطور مہمان خصوصی موجود تھے ، جب کہ تقریب کی صدارت جمعیۃ علماء متحدہ پنجاب کے ناظم اعلیٰ مولانا محمد یحییٰ کریمی نے کی ۔نظامت کے فرائض جمعیۃ علماء میوات کے جنرل سیکریٹری مفتی سلیم احمد قاسمی ساکرس نے انجام دیے۔ ظفرالدین نگر کے نگراں ماسٹر محمد قاسم نائب صدر جمعیۃ علماء متحدہ پنجاب نے خطبہ استقبالیہ پیش کیا ۔اس کے علاوہ جمعیۃ علماء ہند کے سینئر آرگنائزر حضرت مولانا غیور قاسمی نے بھی اظہار خیال کیا ۔ مولانا سعید احمدچیئرمین جمعیۃ علماء ہند یو کے کی دعا پر تقریب اختتام پذیر ہوئی۔جمعیۃ علماء کے مقامی ذمہ داروں میں سے قاری محمد اسلم بڈیڈوی صدر جمعیۃ علماء میوات، مولانا قمر الدین ،صدر جمعیۃ علماء حلقہ فیروز پور جھرکہ،ماسٹر شمساد ، مولانا حسن محمد ہرواڑی صدر جمعیۃ علماء بلاک فیروز پور جھرکہ، ماسٹر کفایت اللہ،مولانا محمد داؤد امینی صدر دینی تعلیمی بورڈ جمعیۃ علماء صوبہ دہلی، قاری محمد زکریا ، محمد عالم گماٹ جنرل سیکرٹری بلاک نگینہ قاری عمران وغیرہ موجود رہے۔وفد نے گھاسیڑہ میں جمعیت یوتھ کلب کے بچوں سے ملاقات کی- نگینہ میں مولانا طاہر امام شاہی عیدگاہ مسجد کی معییت میں مکانات کا جائزہ لیا اور مسجد ابو ہریرہ میں دعاء کرائی۔
