16.1 C
Delhi
February 14, 2025
Hamari Duniya
Breaking News قومی خبریں

بلڈوزر کی سیاست پر نکیل لگانے کے لئے جمعیةعلماءہند پہنچی سپریم کورٹ 

Maulana Syed Arshad Madni

سپریم کورٹ سے ریاستوں کو بلڈوزر کارروائی کرنے سے باز رہنے کی ہدایت دینے کی گذارش، پنجاب وہریانہ ہائی کورٹ نے جس طرح اس معاملہ کا ازخود نوٹس لیا، ہم اسے تحسین کی نظرسے دیکھتے ہیں: مولانا ارشدمدنی
نئی دہلی 8 اگست(ایچ ڈی نیوز)۔
ہریانہ کے ضلع نوح میں مسلمانوں کی املاک پر جاری ظالمانہ بلڈوزر کی کارروائی پر پنجاب و ہریانہ ہائی کورٹ نے از خود کارروائی کرتے ہوئے روک لگا دی ہے لیکن غیر قانونی طور پر انہدام کئے گئے تقریباً ساڑھے چھ سو کچے پکے مکانات کے مکینوں کی باز آباد کاری، معاوضہ اور ٹرانزٹ گھروں میں قیام اور خاطی افسران پر کارروائی کے لئے کوئی حکم جاری نہیں کیا ہے حالانکہ جسٹس گرمیت سنگھ سندھاوالیا، جسٹس ہرپریت کور جیون نے بلڈوزر انہدامی کارروائی پر سو موٹو ایکشن لیتے ہوئے ہریانہ حکومت سے جواب طلب کیا ہے۔بلڈوز ر کارروائی متاثرین کی باز آباد کاری، معاوضہ اور ٹرانزٹ گھروں میں قیام اور خاطی افسران پر کارروائی کے لیئے جمعیة علما ءہند نے سپریم کورٹ سے رجو ع کیا ہے اور عدالت سے درخواست کی ہے کہ وہ تمام ریاستوں کو ہدایت جاری کرے کہ وہ بلڈوز کی غیر قانونی انہدامی کارروائی سے باز آجائیں ورنہ ان کے خلاف سخت کارروائی کی جائے گی۔عدالت سے مزید درخواست کی گئی ہے کہ سپریم کورٹ کی جانب سے بلڈوزر کارروائی پر اسٹے کے علاوہ ریاستوں کو ہدایت نہیں دیئے جانے کی وجہ سے دیگر ریاستیں بلڈوزر کارروائی کررہی ہیں، بلڈوزر کارروائی غیر قانونی ہے، بلڈوزر چاہے کسی بھی مذہب کے لوگوں کی املاک پر چلے۔ مبینہ ملزمین کے گھروں پر یا صرف اس وجہ سے کہ فلاں عمارت سے مبینہ پتھراو¿ بازی کی گئی تھی بلڈوزر سے اسے منہدم کردیا جائے، جرم ثابت ہونے سے پہلے سزا دینے جیسا ہے جو قانوناً غلط ہے۔عرض داشت میں مزید تحریر ہے کہ کسی بھی مکان کو خواہ اس کی تعمیرغیر قانونی ہی کیوں نا ہو بغیر نوٹس دیئے منہدم نہیں کیا جاسکتا، انہدامی کارروائی کرنے سے قبل قانونی کارروائی مکمل کرنا ضروری ہے۔
آفیسر آن اسپیشل ڈیوٹی جواہر یادو کا وہ بیان جس میں انہوں نے کہا کہ فسادات میں ملوث لوگوں کے مکانات منہدم کردیئے جائیں، فسادیوں نے ضلع کا امن ومان برباد کیا ہے، انہیں اس کا خمیازہ بھگتنا پڑ ے گا اس بات کی جانب اشارہ کرتا ہے کہ بلڈوزر چلانے کا مقصد غیر قانونی تعمیرات کو ختم کرنا نہیں ہے بلکہ ایک مخصوص طبقے کے لوگوں کی زندگی اجیرن کرنا ہے۔عرضداشت میں مزید تحریر ہے کہ اتر پردیش، مدھیہ پردیش، دہلی، گجرات اور دیگر ریاستوں میں گذشتہ سال بلڈوزر کے ذریعہ انہدامی کارروائی انجام دی گئی تھی جس پر سپریم کورٹ نے اسٹے لگادیا تھا اور سخت زبانی تبصرے بھی کئے تھے لیکن سپریم کورٹ کی جانب سے تحریر ی ہدایت نہ ہونے کی وجہ سے آج نوح جیسا واقعہ پیش آیا۔عدالت سے درخواست کی گئی وہ بلڈوزر معاملے میں زیر سماعت سماعت عرضداشتوں پر جلداز جلد سماعت کرے۔کیونکہ عدالت نے نوح واقعہ سے قبل ان عرضداشتوں پر ستمبر 2023کے اخیرمیں سماعت کئے جانے کا حکم جاری کیاتھا،جس میں جمعی?علمائ ہند 18/اپریل 2022سے فریق ہے، آج جمعیة علما ءہند کی جانب سے داخل عرضداشت میں مدعی گلزار اعظمی (سیکریٹری قانونی امداد کمیٹی) بنے جبکہ عرضداشت کو ایڈوکیٹ صاریم نوید اور ایڈوکیٹ شاہد ندیم نے تیارکیا ہے جسے ایڈوکیٹ آن ریکارڈ کبیر دکشت نے داخل کیا ہے۔ چار دن تک چلنے والی بلڈوزر کارروائی میں تقریباً سات سو گھروں، دکانوں، ہوٹلوں کو مہندم کیا گیا، مسلمانوں کی کروڑوں کی املاک بغیر کسی عدالتی حکم نامہ کے مٹی میں ملا دی گئیں۔واضح ہوکہ بلڈوزرکارروائی سے متاثرہونے والوں کی جانب سے املاک کو ہوئے نقصان کے معاوضے اورقانونی ضابطہ سے بالاتر ہوکر جن افسران نے انہدامی کارروائی کوانجام دیا اس کے خلاف قانونی چارہ جوئی کو لیکر جمعیةعلماءہند الگ سے آج ایک پٹیشن پنجاب وہریانہ ہائی کورٹ میں داخل کرنے والی تھی مگر بعض اہم کاغذات کے مکمل نہ ہونے سے پٹیشن داخل نہیں ہوسکی، کاغذات تیارکرائے جارہے ہیں اوردوتین روزکے اندرہی یہ پٹیشن بھی داخل کردی جائے گی۔ پچھلے کچھ عرصہ سے ملک بھرمیں نفرت اورفرقہ پرستی کا جو وحشیانہ کھیل جاری ہے، اس پر اپنی گہری تشویش و دکھ کااظہارکرتے ہوئے مولانا ارشدمدنی نے کہاکہ مذہبی شدت پسندی اورمنافرت کی ایک سیاہ آندھی پورے ملک میں چلائی جارہی ہے، اقلیتوں اورخاص طورپر مسلمانوں کو خوف زدہ کرنے کی جگہ جگہ سازشیں ہورہی ہیں، انہوں نے کہا کہ مسلم محلوں میں اور مسجدوں کے عین سامنے اشتعال انگیزیاں ہورہی ہیں، پولس کی موجودگی میں لاٹھی ڈنڈے اورتلواریں لہراکر انتہائی دل آزارنعرے لگائے جارہے ہیں، اورسب خاموش تماشائی بنے ہوئے ہیں، ایسالگتاہے کہ جیسے ملک میں اب نہ توکوئی قانون رہ گیا ہے اورنہ ہی کوئی حکومت جو ان پر گرفت کرسکے، مولانامدنی نے کہا کہ فرقہ پرستوں کے ذریعہ مسلمانوں پر عرصہ حیات تنگ کیا جارہاہے، اورمرکزی حکومت اس طرح خاموش ہے کہ جیسے یہ کوئی بات ہی نہیں ہے،شوبھایاتراکے درمیان ملک کی کئی ریاستوں میں بالخصوص ہریانہ کے نوح میوات واطراف میں فرقہ وارانہ تشدد، اس کے بعد سرکار اور انتظامیہ کی طرف سے مسلمانوں کے مکانوں اور دکانوں کے انہدام پرمولانا مدنی نے سخت تشویش کا اظہارکیاہے۔ایسا لگتا ہے کہ ہندوستان میں اب قانون کی حکمرانی کا دور ختم ہوگیا،سزا اور جزا کے تمام اختیارات حکومتوں نے اپنے ہاتھوں میں لے لئے ہیں، اس کے منھ سے نکلنے والے الفاظ ہی قانون ہیں۔ گھر وں کو زمین بوس کرکے موقع پر فیصلہ کرنے کا آمرانہ رویہ ان حکومتوں کا معمول بن گیا ہے۔گویااب عدالتوں کی کوئی ضرورت ہی نہیں رہی، کیونکہ جوفیصلہ عدالتوں کوکرنا تھا اب ہمارے حکمراں خودکرنے لگے ہیں۔
مولانا ارشد مدنی نے کہا کہ میوات اوراطراف میں ہونے والی بلڈوزر کارروائی کا پنجاب وہریانہ ہائی کورٹ نے جس طرح ازخود نوٹس لیا ہم اسے تحسین کی نظردیکھتے ہیں، سپریم کورٹ میں آج اس سلسلہ میں ایک نئی پٹیشن اس امیدکے ساتھ داخل کی گئی ہے کہ دیگرمعاملوں کی طرح اس معاملہ میں بھی انصاف ملے گا،۔ انہوں نے آگے کہا کہ جب حکومت آئینی ذمہ داری اداکرنے میں ناکام ہوجائے اورمظلوموں کی آوازسن کربھی خاموش رہے توعدالتیں ہی انصاف کے لئے واحدسہارارہ جاتی ہیں،ہمیں پنجاب وہریانہ ہائی کورٹ کے ذریعہ از خودبغیر کسی طلب کے ظلم کے خلاف جوحکمنامہ جاری ہواہے اس سے ظلم پر روک لگانے سے بڑاسہارملاہے۔ماضی میں ہمیں عدلیہ سے انصاف ملا ہے اس لئے پورا یقین ہے کہ اس اہم معاملے میں بھی دوسرے معاملوں کی طرح عدالت عظمی سے ہمیں انصاف ملے گااورعدالت سیکولرازم کی حفاظت کے لئے مضبوط فیصلہ کریگی تاکہ ملک امن وامان کے ساتھ چلتارہے اورمذہب کی بنیادپر کوئی تفریق نہ ہو،ہماری یہ قانونی جدوجہد مثبت نتیجہ آنے تک جاری رہے گی۔اخیر میں مولانا مدنی نے کہا کہ حکمرانوں نے ڈر اور خوف کی سیاست کو اپنا شعار بنالیاہے، میں واضح کردینا چاہتا ہوں کہ حکومت ڈر اور خوف سے نہیں بلکہ عدل و انصاف سے ہی نیک نام اورعدل وانصاف کی حکومتیں چلا کرتی ہیں۔ ان حالات میں ملک کی اقلیتوں کو مطمئن کرنا وزیر اعظم کی آئینی واخلاقی ذمہ داری ہے، کیوں کہ وزیر اعظم پورے ملک کا ہوتا ہے نہ کہ کسی ایک پارٹی فرقہ یا مذہب کا۔انہوں نے انتباہ کیا اگر ملک میں آئین و قانون کی بالادستی ختم ہوئی اور مذہبی ہم آہنگی کا تانا بانا ٹوٹ گیا اورسیکولردستورکو بے اثرکردیاگیا تو یہ بات ملک کے لئے انتہائی نقصاندہ ہو سکتی ہے۔اس لئے ملک کی ترقی کے لئے قانون اوردستورکی بالادستی ضروری ہے۔
واضح رہے کہ جمعیةعلماءہند کی جانب سے داخل پٹیشن کے نمبر اے آئی نمبر. 154797  آف 2023،اے آئی نمبر, 154796 آف  2023یہ ہیں، ایک درخواست میں ہریانہ حکومت کو پارٹی بنانے کی عدالت سے درخواست کی گئی ہے جبکہ دوسری درخواست میں بلڈوزرکارروائی کے خلاف سپریم کورٹ سے مداخلت کی گزارش کی گئی ہے۔

Related posts

بھارت دورے پر ہے آسٹریلیائی ٹیم، کپتان نے کرکٹ کو کہہ دیا الوداع

Hamari Duniya

یکساں سول کوڈ کا جن پھر آئے گا بوتل سے باہر، مسودہ تیار، مانسون سیشن میں پیش کئے جانے کا امکان، بی جے پی کی مشن 2024 کی تیاری

Hamari Duniya

ملک میں نفرت کے خاتمہ کیلئے مرکزی حکومت سنجیدہ، مسلم دانشوروں کے پروگرام میں وزیر داخلہ امت شاہ کے پرنسپل سکریٹری کی شرکت

Hamari Duniya