نئی دہلی،30اگست(ایچ ڈی نیوز)۔
فیروز پور جھڑکہ میں سوسے زائد غریب کسان خاندانوں کے گھرو ں کو بلڈوزر سے مسمار کردیا گیاتھا اور ان کے جانور لوٹ لیے گئے تھے۔ اب یہ افراد کھلے آسمانوں کے نیچے رہنے پر مجبور ہیں ، ان کی بے بسی و کسمپرسی دیکھنے کے لائق ہے۔ جمعیة علماءہند کا وفد جو شروع دن سے ان کی مدد کررہا ہے ، اس نے ان حالات کے مکمل جائزے کے بعد ان کے لیے جلد آشیانہ بنانے کا عزم ظاہر کیا تھا ، چنانچہ صدر جمعیة علماءہند مولانا محموداسعد مدنی نے وہاں سو مکانات کی تعمیر کا فیصلہ کیا ہے۔مولانا مدنی میوات فساد اور ما بعد انہدائی کارروائی سے کافی فکر مند ہیں اور جمعیة کی طرف سے بازآبادکاری عمل کی براہ راست نگرانی و سرپرستی فرمارہے ہیں۔
چنانچہ آج گیاسیان باس فیروز پور جھڑکہ میں دو کالونیوں کا سنگ بنیاد جمعیة علماءہند کے جنرل سکریٹری مولانا حکیم الدین قاسمی، مولانا یحییٰ کریمی ناظم اعلی ٰجمعیة علماءہریانہ ، پنجاب و ہماچل ، مولانا شیر محمد امینی نائب صدر وغیرہ کے ہاتھوں رکھا گیا۔ اس موقع پر مولانا حکیم الدین قاسمی نے بتایا کہ یہاں تین کالونیاں بنائی جائیں گی۔ آج دو کالونیاں’ ظفر الرین نگر‘ اور ’عبدالرحیم نگر‘ کی بنیاد رکھی گئی ہے،اول الذکرحضرت مولانا مفتی ظفرالدین سابق صدر جمعیة علماءصوبہ دہلی اوردوسری کالونی حضرت مولانا عبدالرحیم بڈیڈوی سابق ناظم اعلیٰ جمعیة علماءہریانہ،پنجاب و ہماچل پردیش کی طرف منسوب کی گئی ہے۔یہ ان لوگوں کے لیے بنائی جارہی ہیں، جن کی اپنی زمین ہے۔
باقی جن لوگوں کے پاس زمین نہیں ہے، ان کے لیے جمعیة علماءکی طرف سے زمین کا انتظام کیا جارہا ہے اور ان کے لیے بھی ایک علیحدہ کالونی ’جمعیة نگر‘ کے نام سے بنائی جائے گی۔مولانا حکیم الدین نے بتایا کہ جمعیة علماءہند کا عزم ہے کہ کوئی بھی شخص بغیر چھت نہ رہے اور ضرورت مندوں کو بے سہارانہ چھوڑا جائے۔اسی کی فکر کو لے کر ہمار قافلہ میوات فساد متاثرین کی راحت رسانی میں شروع دن سے لگاہوا ہے۔ یہ قافلہ میوات کے ایک کنارے سے دوسرے کنارے تک سفر کی صعوبتیں برداشت کرکے کر ضرورت مندوں تک پہنچ رہا ہے اور ان کی ہر ممکن مدد کررہا ہے۔
انھوں نے بتایا کہ قانونی سطح پر بھی ہماری جد وجہد جاری ہے۔ جمعیۃ علمائ ہند کے قانونی معاملات کے نگراں ایڈوکیٹ نیاز احمد فاروقی اور ایڈوکیٹ محمد نوراللہ کی نگرانی میں ایڈوکیٹ محمد طاہر روپڑیا اور ان کی مقامی ٹیم قانونی پیروی کررہی ہے ، اب تک 284افراد کی گرفتاری ہوئی ہے، ساٹھ سے زائد افراد نے ہم سے قانونی امداد کی گزارش کی ہے، ہم زیادہ سے زیادہ لوگوں کو تک پہنچنے کی کوشش کررہے ہیں۔
اپنے مکانات کی تعمیر کی بنیاد دیکھ کر فخر الدین ولد دین محمد،شاہد ولد دین محمد،ظفر الدین ولد دین محمد،صدام ولد دین محمد،احمد بھائی ،مشتاق بھائی نے جمعیة علماءہند کا دل کی گہرائیوں سے شکریہ ادا کیا۔ انھوں نے کہا کہ اس گھاٹی میں فساد کے بعد تاریکی اور ویرانی ہے، ایسے وقت میں جمعیة علماءہند ہمارے لیے امید کی کرن بن کر آئی ہے۔مشتاقی بھائی چار ماہ کی جماعت میں ہیں۔ انھوں نے فون سے جمعیة کا شکریہ ادا کیا۔اس موقع پر جمعیة علماءہند کا جو وفد وہاں موجود تھا ، اس میں ناظم عمومی جمعیة علماءہند کے علاوہ مولانا غیور احمد قاسمی،مولانا ضیاءاللہ قاسمی، مولانا معظم عارفی قاسمی، ریاسی جمعیة علماءسے مولانا یحییٰ کریمی، مولانا شیر محمد امینی نائب صدر جمعیة علماءمتحدہ پنجاب، مفتی سلیم ساکرس، ماسٹر قاسم مہو ں، مولانا ناصر وغیرہ شریک تھے۔
