نئی دہلی،03مارچ(ایچ ڈی نیوز)۔
ترکی میں آئے بھیانک زلزلہ متاثرین کے درمیان جمعیة علماءہند کی طرف سے ریلیف و راحت رسانی کا عمل جاری ہے ۔ آج ترکی کے تباہ حال شہر کہرمان مرعش میں جمعیة علماءہند اور الخیر فاﺅنڈیشن کے اشتراک سے کھانے پینے کی اشیاءپر مشتمل فوڈکٹس تقسیم کی گئیں ، ایک کٹ میں 22 کلو میں سامان ہے جس میں چاول ، دال ، آٹا ،تیل ، مسالا وغیرہ شامل ہیں ۔
دریں اثنا جمعیة علما ءہند کے جنرل سکریٹری مولانا حکیم الدین قاسمی کی قیادت میں وفد نے کئی تباہ حال شہروں کا دورہ کیا ہے اور لگاتار ضرورت مندوں تک پہنچنے کی کوشش ہورہی ہے۔جمعیة کے وفد میں مولانا انوار خاں قاسمی ،سید شہباز اور محمد عبداللہ وغیرہ شامل ہیں ۔ مولانا حکیم الدین قاسمی نے الخیر فاﺅنڈیشن کے چیئرمین مولانا امام قاسم سے ملاقات کی اور ریلیف کے طور طریقوں پر تفصیلی گفتگو کی ۔
