ناظم عمومی مولانا حکیم الدین قاسمی کی قیادت میں وفد کا دورہ ، وزیر اعلیٰ ہریانہ کو مکتوب
نئی دہلی یکم اگست(ایچ ڈی نیوز)۔
جمعیة علماءہند کے صدر مولانا محمود اسعد مدنی نے نوح میں فرقہ پرست عناصر کی طرف سے اشتعال انگیز ریلی نکالنے اور اس کے نتیجے میں ہوئے فرقہ وارانہ فساد پر گہری تشویش کا اظہار کیا ہے اور ریاست کے وزیر اعلی منوہر لال کھٹر کو خط لکھ کر خاطی پولس افسران اور فساد کے لیے اکسانے والے افراد کے خلاف سخت کارروائی کا مطالبہ کیا ہے۔ایک دن قبل میوات میں جنید و ناصر کو زندہ جلانے کا ملزم مو نو مانیسر لوگوں کو مشتعل کرنے کی کوشش کررہا تھا، اس کے باوجود انتظامیہ نے کوئی اقدامی کارروائی نہیں کی اور نہ ہی باہر سے اسلحہ لے کر بھیڑ کی شکل میں مقامی مذہبی یاترا میں شامل ہونے افراد کو روکا گیا۔یہ انتہائی افسوس کی بات ہے کہ فساد نوح سے ا?گے تجاوز کرتے ہوئے سوہنا اور گروگرام شہر تک پھیل گیا ہے ، جس کے نتیجے میں انجمن اسلام مسجد نذر ا?تش کردی گئی اور اس کے امام حافظ محمد سعد متوطن سیتامڑھی کودیر رات بڑی بے رحمی سے قتل کردیا گیا ،اسی طرح سوہنا کی بڑی مسجد بھی جلادی گئی۔
جو حالات میوات میں پیدا کرنے کی کوشش کی گئی ہے ، وہ صرف ایک ہنگامی صورت حال کی پیداوار نہیں ہے بلکہ گروگرام ، مانیسراور پٹودی وغیرہ کے علاقے میں لگاتارنفرت پر مبنی پروگرام کیے گئے ،مسلمانوں کے خلاف لوگوں کوکھلے عا م اکسایا جاتار ہا ، متعدد بار ماب لنچنگ کے واقعات ہوئے۔ پوری دنیا میں بدنامی کے باوجود مو نو مانیسر کو اب تک گرفتار نہیں کیا گیا ، اس کو سرکاری پناہ اور ہندو انتہاءپسند تنظیموں کی حمایت ملتی رہی، ایسی صورت حال سے آگاہ کرنے کے لیے جمعیة علماءہند نے ایک ایک واقعہ کی تفصیل لکھ کر وزیر اعلی منوہر لال کھٹر کو کئی بار متوجہ کیا ، لیکن کوئی کارروائی نہیں ہوئی۔جمعیة علماءہند سرکار کی اس مجرمانہ خاموشی پر انتہائی تکلیف اور دکھ کا اظہار کرتی ہے ، وہ ملک کی عظیم تاریخ کو سیاسی مقصد کے لیے قربان کرنے کسی بھی کوشش کو ہرگز قبول نہیں کرے گی۔
چنانچہ خطہ میں امن و امان کے قیام کے لیے آج صبح جمعیة علماءہند کا ایک مرکزی وفد ناظم عمومی جمعیة علماءہند مولانا حکیم الدین قاسمی کی قیادت میں گروگرام پہنچا، گروگرام میں سیکٹر12 کی مورچری میں مقتول شہید امام حافظ محمد سعد کی لاش پڑی تھی ، وہاں جمعیة علماءہند کا وفد سب سے پہلے پہنچا ، اہل خانہ بالخصوص بڑے بھائی شاداب امینی سے ملاقات کی ، مقتول تین بھائی اور چار بہنیں ہیں، ایک بہن زیر علاج ہے۔ وفد نے غمزدہ خاندان کو دلاسہ دیا اور ان کی لاش حاصل کرکے جمعیة کی ہائر کردہ ایمبولینس کے ذریعہ وطن سیتامڑھی روانہ کردیا۔ نیز سیتامڑھی کی جمعیة علماءکو بھی ہدایت دی گئی ہے کہ وہ ان کے خاندان کا خیال رکھے۔ دریں اثنا ءجمعیةعلماءہند کے وفد نے مقامی پولس افسران سے بھی ملاقات کی اور امن کے قیام میں جمعیة علماءہند اور مقامی یونٹوں کی طرف سے ہر ممکن تعاون کی یقین دہانی کرائی۔ اس کے بعد وفد نے نوح کے ڈی سی سے ملاقات کی اور لوگوں کی تشویش اور خوف سے مطلع کیا اور تحفظاتی اقدام پر زور دیا۔جمعیة علماءہند کے وفد میں ناظم عمومی مولانا حکیم الدین قاسمی کے علاوہ مولانا یحییٰ کریمی ناظم اعلیٰ جمعیة علماءمتحدہ پنچاب ، سینئر آرگنائزر مولانا غیورقاسمی ، سینئر آرگنائزر قاری نوشاد عادل ، مفتی سلیم بناری صدر جمعیةعلماءحلقہ گروگرام ، فہیم کاظمی ، عمران، توفیق ، مولانا یامین امن فیلوشپ ،، مولانا چیئرمین ذاکر صاحب ، مولاناشیر محمد امینی صاحب شامل ہیں۔
