نئی دہلی، 18 فروری: انڈیا زکوۃ نے اپنی 2025 کی اچیومنٹ رپورٹ ایک آن لائن تقریب میں جاری کی، جس میں ملک بھر سے بڑی تعداد میں سماجی رہنماؤں، عطیہ دہندگان، رضاکاروں اور مختلف ریاستی ٹیموں نے شرکت کی۔ انڈیا زکوۃ، جو کہ اسوسییشن اف مسلم پروفیشنلز ( اے ایم پی) کا ایک اہم اقدام ہے، 2020 میں اپنے قیام کے بعد اب چھ سال مکمل کر چکا ہے۔ یہ پلیٹ فارم شریعت کے مطابق، شفاف اور منظم زکات کی تقسیم کے لیے جانا جاتا ہے۔
امانت اور جوابدہی کا عزم تقریب سے خطاب کرتے ہوئے عامر ادریسی نے کہا:۔
“انڈیا زکوۃ کی بنیاد اس اصول پر رکھی گئی کہ زکات ایک امانت ہے۔ ہمارا مقصد ہمیشہ یہ رہا ہے کہ ہر روپیہ صحیح مستحق تک مکمل شفافیت کے ساتھ پہنچے۔ یہ رپورٹ اعداد و شمار کی نمائش نہیں بلکہ ادا کی گئی ذمہ داری کی دستاویز ہے۔” انہوں نے بتایا کہ گزشتہ چھ برسوں میں پلیٹ فارم کے ذریعے 30 کروڑ روپے سے زائد زکات جمع کی گئی، 97 ہزار سے زیادہ عطیات موصول ہوئے اور 42 ہزار سے زائد افراد اور ان کے خاندان مستفید ہوئے۔
منظم نظام کی اہمیت
افتخار بڈ کر نے کہا: “انڈیا زکات نے ثابت کیا ہے کہ ٹیکنالوجی اور مضبوط تصدیقی نظام کے ذریعے زکات کی تقسیم کو زیادہ مؤثر اور قابلِ اعتماد بنایا جا سکتا ہے۔”
ریاستی ٹیموں کا کردار
چاند محمد شیخ ( اے ایم پی راجستھان ہیڈ) نے کہا: “ریاستی سطح پر رضاکار مستحق افراد کی شناخت اور تصدیق میں اہم کردار ادا کرتے ہیں، جس سے زکات باوقار طریقے سے مستحقین تک پہنچتی ہے۔” فاروق صدیقی، ہیڈ نیشنل کوآرڈینیشن ٹیم، نے کہا: “ہمارا نظام وقت کے ساتھ مضبوط ہوا ہے۔ تیز رفتار تقسیم اور بڑھتا ہوا اعتماد ہمارے لیے حوصلہ افزا ہے۔”
نظم و نسق اور شرعی رہنمائی
ڈاکٹر عبدالاحد نے زور دیتے ہوئے کہا: “وسعت کے ساتھ مضبوط نگرانی اور شفافیت ضروری ہے۔ انڈیا زکات نے ترقی کے ساتھ ساتھ احتسابی نظام کو بھی مستحکم کیا ہے۔”
تعلیم پر خصوصی توجہ
شیرین سلطانہ ( اے ایم پی تمل ناڈو ہیڈ) نے کہا: “تعلیم کی مدد سب سے مؤثر سرمایہ کاری ہے۔ خاص طور پر پہلی نسل کے طلبہ کی مدد سے پورے خاندانوں کی زندگی بدل سکتی ہے۔”
رپورٹ کے مطابق 2025 میں: 810 سے زائد یتیم اور غریب بچوں کی بنیادی تعلیم میں مدد
680 سے زائد طلبہ کو اعلیٰ تعلیم میں تعاون
350 سے زائد افراد اور علماء کو روزگار میں مدد
180 سے زائد مریضوں کو طبی امداد
112 مستحق بچیوں کو شادی میں تعاون فراہم کیا گیا
تقریب کا اختتام دعا اور اس عزم کے ساتھ ہوا کہ زکات کے منظم اور شفاف نظام کو مزید مضبوط بنایا جائے گا۔