Free Medical Camp
دور حاضر میں طب یونانی کی مقبولیت مسلسل بڑھ رہی ہے: ڈاکٹر سیّد احمد خاں
نئی دہلی، 5 اگست(ایچ ڈی نیوز)۔
آل انڈیا یونانی طبّی کانگریس (دہلی اسٹیٹ) کی جانب سے ’یونانی اپچار- جنتا کے دوار، مشن 2025‘ کے تحت سکندرآباد (یوپی) میں ناصر فاﺅنڈیشن سکندرآباد (کنوینر حکیم عبدالرحمن ندوی) کے اشتراک سے 88 واں مفت یونانی میڈیکل کیمپ لگایا گیا۔ کیمپ سے بڑے پیمانے پر لوگوں نے استفادہ کیا۔ تقریباً پانچ سو لوگوں کو مفت میں دوائیں فراہم کی گئیں۔ آل انڈیا یونانی طبّی کانگریس کے سکریٹری جنرل ڈاکٹر سیّد احمد خاں نے کہا کہ طب یونانی کی مقبولیت مسلسل بڑھ رہی ہے اور سرکاری یونانی شفاخانوں اور یونانی میڈیکل کیمپ میں عوام کے ہجوم کے علاوہ اس کا سب سے بڑا ثبوت یہ ہے کہ آج سے تقریباً 30 سال قبل یونانی دواساز اداروں کی کل تعداد دس تھی وہ آج 100 سے زیادہ ہوگئی ہے اور سبھی دواساز ادارے نفع میں ہیں۔
Free Medical Camp
اسی طرح طبیہ کالجوں کی تعداد 25 سے بڑھ کر آج 65 تک پہنچ چکی ہے۔ سرکاری سطح پر مرکزی اور صوبائی حکومتوں میں ملازمت کے مواقع بڑھ گئے ہیں اور ہزاروں لوگ طب یونانی کے وسیلے سے ملازمت کر رہے ہیں۔ انہوں نے مزید کہا کہ مجھے ان لوگوں پر ترس آرہا ہے جنہیں طب یونانی کی اہمیت کا اندازہ نہیں ہے۔ انہیں یہ معلوم ہونا چاہیے کہ طب یونانی کے فروغ سے عملی طور پر اردو کا بھی فروغ ہوگا اور روزگار بھی ملے گا۔ کیونکہ اس وقت یونانی میڈیکل کالجوں میں باضابطہ اردو عربی اور منطق و فلسفی ابتدائی مرحلہ میں پڑھنا لازمی ہوگیا ہے۔ انہوں نے یہ بھی کہا کہ ہمارے مفت یونانی میڈیکل کیمپ کے مشن کو کامیاب بنانے میں ایک طرف جہاں مقامی ذمہ داروں کا تعاون حاصل رہتا ہے۔
وہیں دوسری جانب دواساز اداروں کا بھی تعاون حاصل رہتا ہے، خاص طور سے ریکس ریمیڈیز، صدر لیباریٹریز، دہلوی نیچرلز، ثنا ہربل، اسکائی ہربل، لمرا ریمیڈیز، بقائی دواخانہ، ذکائی دواخانہ، دواخانہ شفاءالحسنیٰ، رانا ہربلس، سپزر، اولیا ہربلز، شافی دواخانہ، ایبا انڈیا، گریک ہربل (کاس گنج) وغیرہ قابل ذکر ہیں۔ کیمپ کو کامیاب بنانے میں مولانا فیضان، مفتی رضوان، مفتی راشد، آصف، اویس، نظیر احمد، ڈاکٹر شکیل احمد، ڈاکٹر غیاث الدین صدیقی، ڈاکٹر محمد عارف سیفی، حکیم محمد مرتضیٰ دہلوی، حکیم آفتاب عالم وغیرہ نے اہم کردار نبھایا ہے۔ تمام شرکاءکا شکریہ ڈاکٹر شکیل احمد (صدر، آل انڈیا یونانی طبّی کانگریس، دہلی اسٹیٹ) نے ادا کیا۔
