نئی دہلی،20فروری(ایچ ڈی نیوز)۔
دہلی اسٹیٹ حج کمیٹی کی نو منتخب چیئرپرسن کوثر جہاں نے آج اپنا عہدہ سنبھال لیا۔ حج منزل پہنچنے پر کمیٹی کے عملے اور سماجی کارکنوں نے کوثر جہاں کا پھولوں کے گلدستے سے استقبال کیا۔
سماجی اور آر ٹی آئی کارکن محمد شاہد گنگوہی، سابق اسسٹنٹ سکریٹری دہلی اسٹیٹ حج کمیٹی حافظ مطلوب کریم، حج سیوادار شکیل احمد، بی جے پی لیڈر عرفان ملک، حافظ محمد صابرین، حاجی ادریس احمد، محمد ندیم، آفیسر جاوید عالم خان، ڈپٹی ای او محسن علی اوردہلی حج کمیٹی کے دفتر کے دیگر اسٹاب بھی شامل تھے۔ میڈیا سے گفتگو کرتے ہوئے کوثر جہاں نے کہا کہ ان کی ترجیح حج پر جانے والے عازمین کو بہتر خدمات فراہم کرنا ہے۔ انہوں نے کہا کہ دہلی کے حاجیوں کا کوٹہ بڑھانا ہوگا، اس کے لیے سنجیدہ کوششیں کرنے کی ضرورت ہے۔ انہوں نے کہا کہ ہماری کوشش ہوگی کہ کمیٹی کے تمام ارکان کے ساتھ مل کر کام کریں۔ کمیٹی کا کام خوش اسلوبی سے چلایا جائے اور عازمین حج سے متعلق مسائل کا ازالہ کیا جائے۔
