لندن،21جنوری(ایچ ڈی نیوز)۔
کیا آپ تصور کرسکتے ہیں کہ آج کے زمانے میں وزیراعظم کے ذریعہ ٹریفک رول توڑنے کی وجہ سے جرمانہ عائد کردیا گیا ہو۔جی ہاں! ایسا ہوا ہے ۔سیٹ بیلٹ نہ باندھنے پر برطانوی وزیراعظم پر جرمانہ عائد کردیا گیا ہے، برطانوی میڈیا کے مطابق رشی سونک نے سوشل میڈیا ویڈیو بنانے کیلئے سیٹ بیلٹ کھولی تھی۔وزیراعظم رشی سونک نے گزشتہ روز ویڈیو سامنے آنے پر معذرت بھی کی تھی لیکن ٹریفک پولیس نے ان پر جرمانہ عائد کر دیا۔
ترجمان برطانوی وزیراعظم کا کہنا تھا کہ رشی سونک نے سوشل میڈیا کیلئے کلپ بنانے کی خاطر مختصر وقت کیلئے سیٹ بیلٹ کھولی تھی۔لنکا شائر پولیس نے کہا تھا کہ وزیراعظم کے سیٹ بیلٹ نہ پہننے کے معاملے سے آگاہ ہیں اور اس کا جائزہ لے رہے ہیں۔واضح رہے کہ برطانیہ میں مسافر کو سیٹ بیلٹ ہونے کے باوجود نہ پہننے پر ایک سو پاونڈ تک جرمانہ ادا کرنا پڑتا ہے۔
