اداکارہ امیشا پٹیل مشکل میں پھنس گئیں۔ عدالت نے ان کے خلاف وارنٹ جاری کر دیے ہیں۔ جھارکھنڈ کی رانچی سول کورٹ نے دھوکہ دہی اور چیک باؤنس کے معاملے میں امیشا پٹیل اور ان کے کاروباری پارٹنر کنال کے خلاف وارنٹ جاری کیے ہیں۔میڈیا رپورٹس کے مطابق ارگوڑہ کے رہائشی اجے کمار سنگھ نے اداکارہ کے خلاف سال 2018 میں مقدمہ درج کرایا تھا۔
شکایت میں الزام لگایا گیا ہے کہ امیشا پٹیل نے فلم بنانے کے نام پر ان سے ڈھائی کروڑ روپے لیے تھے، لیکن فلم نہیں بنی اور امیشا نے رقم واپس نہیں کی۔ اجے کمار کے مطابق امیشا پٹیل اور ان کے ساتھی کنال نے کہا تھا کہ وہ فلم کی تکمیل کے بعد سود کے ساتھ رقم واپس کر دیں گے۔ فلم ‘دیسی میجک’ کی شوٹنگ سال 2013 میں شروع ہوئی تھی۔ تاہم یہ فلم ابھی تک ریلیز نہیں ہوئی۔ اس کے علاوہ جب فلمساز نے امیشا پٹیل سے پیسے مانگے تو انہوں نے اسے واپس نہیں کیا۔ بعد میں، اس نے اکتوبر 2018 میں 2.5 کروڑ اور 50 لاکھ روپے کے دو چیک دیئے، لیکن وہ باؤنس ہوگئے۔
ایسے میں امیشا پٹیل کے خلاف درج مقدمے میں سول کورٹ نے وارنٹ جاری کیا ہے۔ اگلی سماعت 15 اپریل کو ہوگی۔ بتایا جا رہا ہے کہ چیک باؤنس، دھوکہ دہی اور دھمکی کے معاملے میں مقدمہ درج کیا گیا ہے۔ جھارکھنڈ کے شکایت کنندہ اجے کمار سنگھ فلم پروڈکشن سے وابستہ ہیں۔
