نئی دہلی، 11 جنوری۔ عام آدمی پارٹی کے کنوینر اور وزارت اعلیٰ کے امیدوار اروند کیجریوال نے بھارتیہ جنتا پارٹی کے وزارت اعلیٰ کے امیدوار کو کھلی بحث کا چیلنج دیا ہے۔ اروند کیجریوال نے پارٹی دفتر میں پریس کانفرنس سے خطاب کرتے ہوئے کہا کہ انہیں ذرائع سے معلوم ہوا ہے کہ بی جے پی سنٹرل الیکشن کمیٹی کی حالیہ میٹنگ میں بی جے پی نے سابق ایم پی رمیش بدھوڑی کے نام کو منظوری دی ہے۔ وہ دہلی میں پارٹی کے وزیر اعلیٰ کے امیدوار ہوں گے۔
کیجریوال نے انہیں مبارکباد دیتے ہوئے کہا کہ رمیش بدھوڑی کے نام کا اعلان ایک دو دن میں کیا جا سکتا ہے۔ وہ ان سے جاننا چاہتے ہیں کہ دہلی کے حوالے سے ان کا ایجنڈا کیا ہے اور پالیسیاں کیا ہوں گی؟ وہ انہیں چیلنج کرتے ہیں کہ وہ عوامی مسائل پر کھلی بحث کریں۔
قابل ذکر ہے کہ دہلی کے وزیر اعلیٰ آتشی نے بھی ایسی ہی قیاس آرائیاں کی تھیں اور کہا تھا کہ بی جے پی رمیش بدھوری کو وزیر اعلیٰ کا امیدوار بنانے جا رہی ہے۔ بدھوڑی جنوبی دہلی سے ایم پی رہ چکے ہیں اور حال ہی میں کالکاجی سے آتشی کے خلاف بی جے پی کا ٹکٹ ملا ہے۔
