واشنگٹن،04مارچ(ایچ ڈی نیوز ڈیسک)۔
امریکہ کے صدر جوبائیڈن ایک خطرناک بیماری میں مبتلا ہونے سے بچ گئے ہیں۔ رپورٹ کے مطابق بروقت علاج نے انہیں جِلد کے کینسر کے مرض میں مبتلا ہونے سے بچا لیا۔
غیرملکی میڈیا کے مطابق 80 سالہ امریکی صدر کے سینے سے جلد کے کینسر کا سبب بننے والا زخم ہٹا دیا گیا۔رپورٹس کے مطابق امریکی صدر کے فزیشن کیون او کونر کی لکھی گئی رپورٹ وہائٹ ہاو¿س نے جاری کردی۔
امریکی صدر کے فزیشن کی رپورٹ کے مطابق صدر بائیڈن کے طبی معائنے کے دوران ان کے سینے پر کینسر کا سبب بننے والے زخم کی تشخیص ہوئی تھی جسے گزشتہ ماہ کامیابی سے ہٹایا گیا۔رپورٹ میں بتایا گیا ہے کہ کینسر کا سبب بننے والا زخم پھیلتا نہیں اور اسے 16 فروری کو ہٹایا گیا۔فزیشن کی رپورٹ میں کہا گیا ہے کہ امریکی صدر کو مزید علاج کی ضرورت نہیں اور وہ اپنے فرائض کی ادائیگی کے لیے مکمل فٹ ہیں۔
دوسری جانب غیرملکی میڈیا کا کہنا ہے کہ جوبائیڈن 2024ءمیں ہونے والے صدارتی الیکشن میں حصہ لیں گے جس کا اعلان وہ جلد کریں گے۔
واضح رہے کہ امریکی صدر جوبائیڈن اس وقت ڈیموکریٹس کے درمیان موضوع بحث بنے ہوئے ہیں کہ وہ انتخابات میں حصہ لیں گے یا نہیں۔
