ممبئی، 09 جنوری (ایچ ڈی نیوز)۔
آل انڈیا دینی مدارس بورڈ کا تعلیمی کارواں بروز پیر بتاریخ 8 جنوری کو مولانا خلیل احمد دیوا مظاہری استاد حدیث فلاح دارین ترکیسر کی دعوت پر منارا مسجد سورت پہنچا، جہاں بعد نماز عشاء صدر بورڈ مولانا محمد یعقوب بلند شہری نے حاضرین کو خطاب کرتے ہوئے کہا کہ ہندوستانی مسلمانوں کے سامنے بہت سارے مسائل ہیں جن میں سب سے اہم مسئلہ اپنے اور اپنی نسلوں کے ایمان کو بچانے کا ہے شیطان لعین اپنی پوری طاقت کے ساتھ ہمیں اور ہماری نسلوں کو مرتد بنانے کی دن رات کوشش کر رہا ہے اور ہم خواب غفلت میں ڈوبے پڑے ہیں سبھی علماء کرام ائمہ مساجد ذمہ داران قوم کی ذمہ داری ہے کہ اپنے آپ کو اور اپنے اہل وعیال کو جہنم کی دردناک آگ سے بچانے کی کوشش کریں۔
مولانا بلند شہری نے کہا کہ اگر ساری قوم اپنے بچے اور بچیوں کی شادیاں سنت کے مطابق سادی کرنے والے بن جائیں اور ان میں خرچ ہونے والا کروڑوں روپیہ بچا کر اپنی نسلوں کی تعلیم و تربیت پر خرچ کریں تو ایک صالح معاشرہ وجود میں آسکتا ہے۔
پروگرام میں شرکت کرنے والوں میں مولانا محمد انور مصری مظاہری، مولانا خلیل احمد دیوا مظاہری استاد حدیث ترکیسر، مولانا محمد امام و خطیب منارا مسجد سورت، نسیم بھائی سورتی، حاجی محمد عمر چاندی والا، قاری شاہجہاں سہارنپوری وغیرہ کے علاوہ کثیر تعداد میں مصلیان حضرات شریک رہے۔
