لکھنؤ، 21 فروری (ایچ ڈی نیوز)۔
سماج وادی پارٹی (ایس پی) کے قومی صدر اکھلیش یادو نے بجٹ اجلاس کے دوسرے دن بی جے پی حکومت کو نشانہ بنایا۔ ایوان کی کارروائی کے بعد میڈیا سے گفتگو کرتے ہوئے انہوں نے الزام لگایا کہ کانپور دیہات میں ماں بیٹی کی موت کا واقعہ حکومت کے کہنے پر پیش آیا۔ حکومت بلڈوزر چلا کر غریبوں کو پریشان کر رہی ہے۔ حکومت کی بلڈوزر پالیسی غریبوں کی جان لے رہی ہے۔
اکھلیش یادو نے کہا کہ اس واقعہ کے بعد ذمہ دار سینئر عہدیداروں کے خلاف کوئی کارروائی نہیں کی گئی ہے۔ بلڈوزر کی تصویر پوری دنیا دیکھ رہی ہے۔ انوسٹر سمٹ پر سوال اٹھاتے ہوئے ایس پی صدر نے کہا کہ حکومت 40 لاکھ کروڑ کی سرمایہ کاری کہاں سے لائے گی، اسے اس کی وضاحت کرنی چاہئے۔ بی جے پی حکومت میں مہنگائی عروج پر ہے، بے روزگاری بڑھ رہی ہے۔ اکھلیش نے حکومت پر ڈیزل اور پٹرول کی قیمتوں میں اضافہ کا الزام لگایا۔ انہوں نے کہا کہ بی بی سی جیسے ادارے پر چھاپوں کی کارروائی خوفناک ہے۔
قابل ذکر ہے کہ ودھان سبھا اجلاس کے دوسرے دن کی کارروائی کے دوران ایس پی صدر اکھلیش یادو نے آنجہانی ودھان سبھا ممبران کو خراج عقیدت پیش کیا۔ اس دوران انہوں نے اپنا دل (ایس) ایم ایل اے راہل کول کو خراج عقیدت پیش کیا۔ آنجہانی ایم ایل اے راہل پرکاش کول مرزا پور ضلع کے چنبے اسمبلی حلقہ سے ایم ایل اے تھے اور طویل عرصے سے بیمار تھے۔ ممبئی کے ایک اسپتال میں علاج کے دوران ان کی موت ہوگئی۔
