نئی دہلی، 11 فروری(ایچ ڈی نیوز)۔
آل انڈیا یونانی طبّی کانگریس کے زیراہتمام محکمہ آیوش، حکومت ہند کے فیصلہ کے مطابق ہر سال 12 فروری کو ممتاز مجاہد آزادی مسیح الملک حکیم اجمل خاں کے یوم پیدائش پر ’عالمی یوم یونانی میڈیسن‘ منائے جانے کا جو سلسلہ شروع کیا تھا اسی کڑی میں 12 فروری 2023 کو صبح 11 بجے کانسٹی ٹیوشن کلب، نئی دہلی میں نیشنل سمپوزیم بعنوان ’ہندوستان: یونانی میڈیسن کا عالمی رہنما‘ منعقد ہوگا۔
پروگرام کی صدارت پروفیسر مشتاق احمد کریں گے جبکہ مہمان خصوصی آیوروید یونیورسٹی جودھپور کے وائس چانسلر پروفیسر پردیپ کمار پرجاپتی ہوں گے۔ اس کے علاوہ مہمانان مکرم کی حیثیت سے پروفیسر ایس ایم عارف زیدی (ڈین، جامعہ ہمدرد)، پروفیسر محمد زبیر (پرنسپل، اے اینڈ یو طبیہ کالج، قرول باغ، نئی دہلی)، ڈاکٹر سیّد فاروق (چیئرمین، ہمالیہ ڈرگ)، پروفیسر محمد ادریس (سابق پرنسپل، اے اینڈ یو طبیہ کالج، نئی دہلی)، ڈاکٹر عبدالرؤف (چیئرمین، شعبہ علم الادویہ، اجمل خاں طبیہ کالج، علی گڑھ مسلم یونیورسٹی)، پروفیسر خان محمد قیصر (صدر شعبہ تحفظی و سماجی طب، ممبئی) وغیرہ شرکت کریں گے۔
اس موقع پر حکیم محمد افہام اللہ (علیگ) کی حیات و خدمات پر مشتمل عالمی یوم یادگار مجلہ 2023 کا اجرا عمل میں آئے گا اور ملک بھر سے منتخب شخصیات کو ایوارڈز سے بھی نوازا جائے گا۔
